Club World Cup-ah Chelsea an mawi

FIFA Club World Cup quarterfinal-ah Chelsea chuan Palmeiras 2-1 a hnehin semifinal an lut. London club tan Cole Palmer-a'n minute 16-naah goal hmahruai khungin season thara Blues zawm tur Estevao-a'n Palmeiras tan minute 53-naah si phurh a sut. Minute 83-naah Brazilian club right back Agustín Giay-a'n an lamah a tilut a, chak phu zawk Chelsea-in 2-1 in hnehna an chang.

Lincoln Financial Field-ah Diogo Jota leh a unaupa Andre Silva sunna hun hman a ni a, Blues captain Enzo Fernández leh Portuguese winger Pedro Neto te chuan player pahnih hming chuanna kawr an pawt parh. Philadelphia-a inkhel entu hi 65,782 zet an ni.

Ṭan phat aṭangin Chelsea an nung a, Palmer a hmuhnawm nghal a, a goal khung pawh a mawi. Christopher Nkunku-a'n goal khung theihna hun ṭha a bawhpelh a, Brazilian club-in si phurh an nawr let na. Second half-ah angle awm mang lo aṭangin Estevao-a'n a pet lut a, Chelsea zawm mai tur ni mah se a goal khung a lawm nasa hle.

Philadelphia-ah Palmeiras ṭantu an ṭhahnem a, mah se minute 90 chhunga team ṭha zawka ngaih theih English club an vannei ta zawk. Chelsea wing back Malo Gusto cross chu Agustín Giay-a'n an lamah a tilut a, Enzo Maresca hoten tlarhnung tiphui zuiin hnehna an chang.

Inkhelh banah Chelsea boss Enzo Maresca chuan, "First half-a inkhel kan thunun dan te leh inkhel tawp lama kan khelh dan thlir chuan vanneih ngai loa chak thei tur kan ni," tiin a sawi. Blues hian hrem vangin Moises Caicedo an chhawr thei lo a, hliam vanga Romeo Lavia leh Reece James te an hahdamtir chungin hnehna an chang tho.