British nula Raducanu zinkawng a tawp

Wimbledon ṭan hma aṭangin Emma Raducanu chu hming hriat hlawh leh sawi lar a ni a, a khel chhe lo bawk. Mahse, British mipui te ṭan rawn a ni chungin world number 1 Aryna Sabalenka meuh chu a paltlang zo ta lo.

Zirtawpni zan khan Centre Court-ah Raducanu hi a inlan a, seeded pakhatna lakah hian 7-6 (8-6), 6-4 in a chak lo. BBC chhinchhiah dan chuan BBC iPlayer aṭangin an inkhel kha maktaduai 1.2 chungain an en a, final ni loah chuan Wimbledon match online hmanga entu tam ber an ni hial.

Kum 22 mi Raducanu chuan, ""Aryna hi player ṭha leh ropui bik a ni a, ani meuh hmachhawn chu a harsa a ni. Number 1 a ni a, khatiang taka a lak ka khel ve thei pawh kha thil lawmawm a ni," tiin chak lo mah se a khelh danah a lungawi tih a sawi.

Raducanu hian 2021 US Open nomawi kha a chawi a, tennis khawvel a barakhaih. A hnuah erawh ropui taka khelh chhuah a nei leh hleithei lo, tennis ngainatu British mi ten a chanchin an sawi nasat avangin hmeichhe player zinga hriat hlawh leh enbik a tling phak tho a ni.

Hmeichhe player langsar an chesual nasa hle a, seeded pakhatna aṭanga pangana zingah Sabalenka chauh hi dam a awm tawh. Belarus star hian nizan khan Elise Mertens a hmachhawn leh nghal a, last 16 inkhel result erawh kan hre hman ta lo.

Inkhel dangah Iga Swiatek erawh a la chak zel thung, seeded pariatna hian Danielle Collins chu 6-2, 6-3 a hnehin last 16 a inhlangkai ve ta bawk a, zaninah Clara Tauson nen quarterfinal luh inchuhin an inkhel zui leh ang.

Polish nula Swiatek chuan, "Tun hma lama ka sulhnu leh khelh dan te ka chhut let a, ka tan chuan last 16 thlen hi a lawmawm. A nihna takah chuan grass court-ah hi chuan mi pawhin min beisei sang ngai lo tih ka hria.

"Kuminah duhthusamin ka la khel lo a, chutiang chunga Wimbledon ka khelh dan hi lawmna tur a tam hle. Ka hmachhawn leh tur Clara Tauson hi player ṭha tak a ni tih ka hria, fimkhur takin ka khelh a ngai dawn a ni," tiin a sawi.

Hun rei tak chhung world number 1 pawh lo ni tawh Swiatek hian French Open nomawi pali leh US Open title vawi khat a la tawh, kum 24 mi chauh ni chungin Grand Slam vawi nga a champion tawh a, grass-ah sulhnu ṭha neih tumin a bei leh mek.