Man United-in left back Leon an la lut

Manchester United chuan left back Diego León an tlangzarh a, kum 18 mi Leon hi Paraguayan player zinga Man United tana khel hmasa ber a ni.

English club hian kumin January thla khan nipui bazarah Leon an lakluh tur thu hi an puang a, Inrinni khan Paraguayan defender hmabak nei êng tak hi an tlangzarh.

Leon hian Paraguay club Cerro Porteno aṭangin bul a ṭan a, Man United senior team-a khel pha mai tur niin a lang lo thung. Chutihrualin a bul ṭan dan thlir chuan eng pawh a thleng thei thung.

Paraguay chanchinbu chhiar hlawh ABC Color chuan, "Left back mamawh," tiin an ziak a, Paraguay top flight khel Cerro Porteno-in left back an mamawh vang a ni.

Porteno left back pahnih inhliam vangin an khel thei lo a, coach Manolo Jimenez-a'n duh thlan tur pahnih chiah a nei. Right back-a khel Victor Cabanas chu left back a dah a ni a, pakhat leh chu left back-a Leon bul ṭantir a ni.

Nikum August thla khan Sportivo Ameliano lakah Jimenez-a'n Leon bul a ṭantir a, goal awmchhun tauh lutin 1-0 in Porteno an chak. An inkhelh lehah pawh goal a khung lehnghal a, coaches association-in plyaer of the month-ah an thlang.

Leon hian a hun ṭha a bawhpelh lo a, kum 17 mi niin Cerro Porteno tan Paraguayan Primera Division-ah match 19 a khel a, kuminah pawh match 12 a khel leh tawh. Tunah chuan kum 18 mi a ni tawh a, Brazilian defender Marcelo ngaisangtu Leon hian Manchester United first team-a khelh phak a tum dawn a ni.