Player 9-in PSG an chak, Musiala a hliam na
European champion Paris Saint-Germain chuan player pakuaa khelin German champion Bayern Munich 2-0 in an hneh a, French champion hian FIFA Club World Cup semifinal-ah Real Madrid an hmachhawn ang.
Inrinni zan inkhelah Jamal Musiala chu ke ruh tliak vangin first half-ah lakchhuah a ni a, Desire Doue-a'n minute 78-naah PSG tan goal hmahruai a khung chauh. Willian Pacho leh Lucas Hernandez te hnawhchhuah an ni zui a, Bayern-in an tamna hmang ṭangkai loin player pakuaa khel PSG tan Ousmane Dembele-a'n chak nemnghehna goal a khung.
Musiala a hliam na
Mercedes-Benz Stadium-ah PSG leh Bayern ten inkhel hmuhnawm an pho chhuak a, goal erawh hmuh tur a awm mai lo. First half tawp dawn ṭepah Michael Olise ball pass na hret chu Musiala-a'n a um lut a, PSG goalkeeper Gianluigi Donnarumma-a'n rawn chilhin Germany international midfielder hian a ke vei lamah hliam a tuar.
Bayern Munich sporting director Max Eberl chuan Musiala hi damdawi inah hruai nghal a nih thu a sawi a, German club captain Manuel Neuer a lawm lo. Neuer chuan, "Khatiang hunah kha chuan goalkeeper-te an fimkhur a ngai a, khatianga luh chilh kha chu a hlauhawm lutuk. Kan khingpui player-te kan hliam thei tih hre chungin a lut a ni," tiin PSG keeper Donnarumma a sawisel.
Chutihrualin thil thlen dan thlirin Donnarumma a inthiam lo tih a lang a, inkhelh banah pawh instagram-ah, "Ka ṭawngṭainaah ka hre reng che a, i dam leh thuai theih nan duhsakna sang ber ka hlan a che," tiin Musiala tan a ziak.
Musiala hi ke vei lam ruh tê zawk (fibula) a tliak a, a ligament a chhe nual bawk. A hliam nat dan thlirin thla 4-5 chawl tura ngaih a ni a, Musiala hi April thla khan malpui hliamin a tlakbuak a, tun inelna aṭangin a rawn inlan leh chauh bawk.
European champion
PSG leh Bayern inkhel a nung ṭha a, goal lut har mah se hmuhnawm thlir tur a tam. Bayern defender Dayot Upamecano goal khung chu offside vangin pawm a ni lo a, Neuer-a'n ṭha zetin Bradley Barcola goal khung tur a dang bawk.
Hun tawp lamah PSG-in team ṭha tak tak an ni tih an pholang a, rawlthar duhawm Doue-a'n minute 78-naah goal ṭha bik a khung. PSG defender Pacho chu goal luh aṭanga minute linaah Leon Goretzka a tlawh vangin hnawhchhuah a ni a, defender Hernandez pawh Raphael Guerreiro a nghawk vangin an hnawt chhuak.
Hernandez hnawhchhuah hma hian Harry Kane-a tauh luh chu offside vangin pawm a ni lo a, Bayern an vanduai. Chutihrualin Luis Enrique kaihhruai PSG an huaisen ve bawk a, player pakuaa khel chungin counter attack-ah an hlauhawm. Dembele-a'n crossbar a pet per hnuah a hun ṭha neih dang a hmang ṭangkai a, injury time minute ruknaah chak nemnghehna goal a khung.