Inter Veng Basketball: Ramhlun North an tla

LESDE MBBA Inter Veng Basketball Tournament-ah champion rinkai ni phak Ramhlun North chuan an match hmasa berah Kanan hneh loin an tla. Ramhlun North hian kum 2023 khan Chhinga Veng Branch YMA Diamond Jubilee Thanpari Pautu Memorial Inter Branch YMA Basketball Tournament-ah an champion a, MBBA buatsaih Inter Veng Basketball inelnaah erawh an tla nghal.

Veng leh veng basketball inelna hi July 3, Ningani aṭangin R. Dengṭhuama Stadium, Mualpuiah khelh ṭan a ni a, inelna buatsaihtu MBBA hian Season Opening Tournament nen a buatsaih kawp avangin player-te pawh inelnaah an insawrbing thei lo a, a hlut tur angin a hlu lo.

Chutihrualin veng/khua thiam ber zawnna a nih miau avangin stage sang chinah chuan ngaihven a hlawh tho a rinawm. Inrinni inkhelah Ramhlun North tla mah se team ṭha Mission Veng, Tuikhuahtlang leh Khatla South ten hnehna an chang thung.

Vawiin hian inelna hi chhunzawm a ni dawn a, zanin dar 8:00-a inkhel tur Bethlehem Vengthlang leh Zarkawt inkhel a hmuhnawm ang.