Mbappe a rawn inlar ta, semifinal-ah PSG!

Inelna lianah Real Madrid an danglam a, team 32 telna FIFA buatsaih Club World Cup-ah pawh Xabi Alonso hote champion turin an buk a rit leh tawh hle. Los Blancos hian Inrinni zan khan Borussia Dortmund chu 3-2 in an hneh a, chakna goal khungtu chu Kylian Mbappe a ni. French star Mbappe a dam tawh a, semifinal-ah a club hui PSG a hmachhawn dawn.

Garcia bawk

MetLife Stadium, East Rutherford-ah entu 76,611 an pung khawm a, tun inelnaa entu tam ber ṭum a ni. Real Madrid tan Gonzalo Garcia-a'n inelna a hmang ṭha a, quarterfinal-ah pawh goal a la khung zel.

Minute 10-na lekah Arda Guler-a ball pek luh chu box chhung aṭangin Gonzalo-a'n a khung a, Madrid tlangval hi goal hmaah a hriam hle. Los Blancos-in inkhel an thunun zui a, passing mawi tak hmangin Dortmund tlarnung ṭhiatin minute 20-naah Fran Garcia-a'n a khung. A siamtu chu Trent Alexander-Arnold a ni a, Alonso-a'n Liverpool aṭanga an lakluh hi a hmang thiam nghal hle.

A tawpah Mbappe

Minute 90 hnu lamah inkhel a nung thar a, goal thum bakah red card hmuh tur a awm. Hun pek belh minute hnihnaah Maximilian Beier-a'n Dortmund si phurh a sut ṭhen a, 2-1 a ni.

Second half-a bench aṭanga rawn lut Mbappe-a'n minute hnih hnuah a theihna a rawn lantir zui a, Arda Guler-a cross chu mawi zetin a bicyle kick lut. 3-1 a nih tak avangin Real Madrid an hima ngaih ni mah se minute hnih hnuah Dean Huijsen chu hnawhchhuah a ni.

Penalty aṭangin Serhou Guirassy-a'n Dortmund si phurh a sut ṭhen a, nuam sain Real Madrid an chak lo. Real keeper Thibaut Courtois-a'n hun tawp hmain save ṭha a nei a, a tawpah Alonso hote 3-2 in an chak hram.