Arsenal striker thar tur Gyokeres?

Football nipui bazar lai a ni bawk a, chanchin langsar a thleng chho zut reng mai. Arsenal chuan striker thar an nei ngei dawn niin a lang ta - Gunners hian Viktor Gyokeres chu mimal inremna an neihpui tawh.

Khawthlang chan-chinbu mite tarlan dan chuan, North London club hian Gyokeres hi kum nga daih contract an ziah pui a, a hlawh tur zat pawh kar khatah pound nuai hnih vel niin an sawi, inremna nei tawh mah se thuziak erawh a la ni lo.

Premier League club-in Gyokeres an lak theih nan chuan Sporting Lisbon leh Arsenal te an inrem tel a la ngai dawn, nimin tlai thleng kha chuan inbiakna tluang takin a kal zel a, season thar inbuatsaihna an neih ṭan hma ngeiin an in lei fel hman a rinawm.

Mikel Arteta-a'n striker thar lei ngei a duh a, hun rei tak chhung chu Gyokeres leh Benjamin Sesko te an hel kual a, club leh player ngaihdan leh duh dan hrang hrang an hriat hnuah RB Leipzig striker Sesko aiin Gyokeres buk a rit ta zawk tihna a ni.

Gyokeres hian kum 2023 khan Coventry aṭangin Sporting Lisbon hi a zawm a, season hmasa khan Portuguese club tan hian inelna hrang hrangah goal 54 khungin striker hriam leh ngaihven hlawh berte zinga mi a ni phak.

Sporting leh Manchester City ten Champions League an khelh ṭumin hattrick a siam thei a, theihna a nei sang tih chu a chiang. Chutihrualin, tun hmain Brighton tan a lo khel tawh a, EPL hnuai Championship lamah pawh khelin a che ropui hran lo.

Mi tam tak chuan English football leh Viktor Gyokeres te hi inrem vak loah an ngai a, a theihna fiah a hmabak dawn a ni. Hei erawh hriat tel a fuh ang - Manchester United manager Ruben Amorim-a'n lakluh a duh a, mahse Gyokeres hian North London lam a hawi ta zawk.

Viktor Gyokeres hian June 4 khan kum 27 a tling hlim chauh a, vanglai hmang mek a ni. 6ft 2in a sang niin ball kangah a hlauhawm a, tharum a ngah bakah ball a tlanchakpui thei viau bawk - Sporting tana a chet danah chuan striker ṭha a ni; Arsenal tan ni ve tak ang maw?

Arsenal hian nipui bazar chhungin goalkeeper Kepa Arrizabalaga an la fel tawh a, tun hnai khan midfielder Martín Zubimendi chu an ziak lut fel leh tawh bawk. Sporting director Andrea Berta hnuaiah an bazar chhunzawm zel bawk.

Kum 26 mi Zubimendi hi pound maktaduai 60 man niin season nga daih contract a ziak a, deep-lying midfielder niin season tharah chuan Declan Rice leh Martin Odegaard te tha ti chak zuaktu a ni thei tura ngaih a ni - Spanish midfielder thi Mikel Mireno an nei bawk a ni.

Zubimendi chuan, "Arsenal ka thlan chhan chu an khelh dan hi ka khelh dan nen a inmil vang a ni. Tun hnaiah theihna sang tak an nei tih an lantir fo tawh a, club hmathlir ka hriat hnuah phei chuan an zinga tel ve hi ka chak," tiin a sawi.

Gunners hian season thar inbuatsaihna an le nei ṭan lo, bazar lamah erawh Brentford captain Christian Norgaard chu inremna an neih pui tawh bakah Chelsea winger Noni Madueke leh Crystal Palace forward Eberechi Eze te nen an inhnimhnai hle bawk.