Quarterfinal-ah Sabalenka a lut

Hmeichhe player langsar tam tak an chetsual karah Aryna Sabalenka erawh nghet takin a ding zel, world number 1 hian Elise Mertens chu 6-4, 7-6(4) a hnehin Wimbledon khelh laiah quarterfinal a lut.

Kum 27 mi Sabalenka hian tun hmain Wimbledon nomawi a la chawi ngai lo, kum 2021 leh 2023 khan semifinal chu a lo thleng tawh, kuminah hian seeded sang zual panga zinga dam awmchhun a nih tawh avangin beisei pawh a nei sang rih hle ang.

Belarus nula Sabalenka chuan, "Inkhel hautak a ni satliah lo, taksa leh rilru inbeihna a tel avangin a hautak hle. Mertens kha player ṭha leh fing a nih avangin hmachhawn a harsa takzet.

"Eng pawh thleng thei a la ni a, tunah hian champion sawi hun a la ni lo. Hmabak ka la ngah a, kan kalkawng lo lamah, kawng leh lam zawkah player ṭha tak tak an lo kal ve zel bawk, a tawpa hlim ber nih ngei erawh ka tum," tiin champion ngei a tum.

Inkhel dangah Laura Siegemund erawh a chak, kum 37 mi Siegemund hi Wimbledon khelh hma kha chuan thleng sang tura rinkai zingah a tel phak lo. Tunah chuan last 16 khel phak zinga upa ber a ni, a hmabak chu Sabalenka a ni ang.

Siegemund hian Solana Sierra chu 6-3, 6-2 in a hneh. Sierra hi Wimbledon khel tur zinga mi an inhnuhdawh zara inlan ve thei chauh a ni a, beisei phak bakin thleng sang mah se a vanneihna chuan a tlin ta bik lo a ni.