Silly Point : Edgbaston kulhpui a chim

Mizoram rambuai lai 1967 aṭang khan Hamara Desh hian Kumpinu ram an tlawh apiangin Edgbaston, Birmingham-ah hian Test match hi an khelhpui deuh ziah a. Ṭum kua an inhmachhawnnaah tuilet hnua a vawi khatna atan India-in hnehna an chang. Shubman Gill leh a hoten Edgbaston kulhpui an luhchhuah a, a vawi khat nan hnehna hlado an chham.

A ni, Asia rama team cricket khel ṭhin India, Pakistan, Sri Lanka, Bangladesh leh Afghanistan zinga Edgbaston-a hnehna chang thei hmasa ber chu India team ngei hi an ni.

Super Captain

Chhuak hmasa lama kan ziah angin Jasprit Bumrah tel lohna India hian chak tur chuan 1st innings-ah runs tam thei ang ber an siam a ngai ang kan ti a, kan tih ang chiahin an rawn thawk chhuak a, a hmatawng chu captain thar Shubman Gill a ni. He kum 150 upa Test cricket, innings pahniha bat vuak ngaihna inkhelah hian, tu batsman mahin innings pakhata double century an vuakchhuah hnuah, innings pakhat zawka run 150 aia tam vaw chhuak nawn an la awm ngai lo.

Mahse, Shubman Gill chuan he history hi a rawn siam ta. Sunil Gavaskar-a'n West Indies laka Port of Spain Test 1971-a run 344 a siam kha India record a ni reng ṭhin a, captain Gill-a'n a rawn khum. Gill hian run 100 dawna rawn khum a, run 430 a rawn vaw chhuak a, record hi an rawn khum mai pawh a rinawm loh.

Headingley Test khelh hmasak takah a naute a ho dan leh a kaihruai danah sawisel a hlawh nasa hle. Cricket mi ril ṭhahnem tak phei chuan captain ni chi vak loah an ngai hial a nih kha. Mahse, Gill chu nitin puitlinna kawngah a ṭhanglian zel tih a chiang a, coach Gautam Gambhir leh chief selector Ajit Agarkar-a ten a kutah thuneihna zau tak an dah tih a lang.

Cricket pundit tam zawk leh he thu ziaktu ngei pawhin column hmasa lamah Kuldeep Yadav kheltir ngei ngei tura ka lo thailan laiin,Washington Sundar zawk an thlang lui nghat a, a lo fuh zawk ta phian lehnghal. Hei hi captaincy awmzia chu ni mai awm asin- thuthlukna huaisen leh mawhphurhna lak ngamna hi.

Bihari tlangval Akash

IPL star tuna England-a Under 19 series khel mek kum 15 mi Vaibhav Suryavanshi a chanchin thailan tum ka ni lo a. India tan star thar a piang a, a cricket zinkawng leh hring nun hrim hrim pawh a ngaihnawm ngang mai. 'Dawhtheihna leh nghah peihna' hmanga Khuanuin hrual a tum bik ni awma mawi, cricket tui luat avanga chhungte leh khawtlangin an endawng hial a ni.

Kum 14 mi a nih laia ṭhenawm state Bengal-a tlanbo, ni khata khamkhawp chaw ṭum khat pawh ei tur hmu zo lo fo. Inhlawhfa chawp a, cricket academy a inziak lutin, Kolkata local league-a a ball vawm kawh zet chu khatih hunlai India player leh Bengal captain Manoj Tiwary-a'n a hmu fuh hlauh.

Tiwary hian a thlazarna hnuaia a enkawl a, Eden Gardens Stadium-a a riahna tur pindan pakhat an siamsak a, a cricket ball vawm thiamna talent an tahhriam sak. Kum sarih a lo vei meuh chuan India team back-up baller aṭanga test cricket star lo ni ta Akash Deep a chanchin hi kan sawi tur chu a ni.

He England team lakah tho hian ani thla 17 lek liam ta nikum Ramtuk Thla khan India tan Ranchi khelmualahah a debut a siam a. Bowler rinrawl ber ni ta lo chu khel zeuh zeuh chauh kha a chanpual a ni. Mahse a hringnun chhuk chhoa Khuanuin a lo hrual dan ang chiahin, hun remchang leh malsawmna hun rawn inher apianga dawhthei taka dawhthleng chu kut khing hniha lo dawhfuh pawimawhzia khawvel hmuha rawn phochhuak.

Bawngpa chu a kiah tak manfuh hian an hlauhawmna lai ber hi an chak lohna lai a ni an tih ṭhin angin he England batting line up Bazball khelh tir thei lo khawpa an tactic ti ṭhuanawp tu chu Akash Deep a ni a. Kum 50 chhunga Test cricket inkhela wicket 10 la thei zinga England batting line up bowler pakhatin ṭhiat darh thei awmchhun zinga record turu ber a rawn nei ta hial.

Kum 1976-a Michael Holding-a'n English batting line up top 5 zinga palite a vawm hlum hnuah, cricket bowling lama mi hrang Wasim Akram, Allan Donald, Glenn McGrath, Muttiah Muralitharan, Shane Warne etc te pawn an tih theih loh chu Akash Deep a hian England leilung a rah hnuah a vawi khat inkhelnaah rawn ti thei tlat. Back up bowler mai mai chu a ni tawh dawn lo, tih a chiang reng mai.

Kum 2015 khan Akash Deep hi a zuapa leh amah chhangtu a uin an thihsah a, a tana mi hlu bik pahnih boruak inkarah thla ruk chauh a tla. Cancer natnain a farnu neihchhun a tlakbuak mek a, hun harsa karah a rawn vul - Bihar tlangval Akash Deep, i hringnun atang hian zirtur ka va ngah si em.

Lords lamah mit i len ang

A thawh thumna hi naktip mai hian Cricket mecca Lord's, London-ah an khelh chhunzawm dawn a, a ngaihnawm chho telh telh dawn a nih hi maw. Engpawh nise, India team te an rawn harh chhuak ṭha e ti phawt mai ang aw...