Mumang ramah Lando Norris a cheng

British tlangval a ni a, an ramah Formula 1 intlansiakna an ngaisang hle - Lando Norris tan chuan anmahni ram ngeia hnehna chan chu thil hlu leh lawmawm bik a ni a, tunah chuan a suangtuahna leh mumang ramah a cheng thei ta.

Pathianni zan khan Silverstone tlankawngah British Grand Prix tlan a ni a, tualchhung tlangval Lando Norris chuan hnehna changin amah ang bawka McLaren car khalhtu Oscar Piastri chu pahnihna a ni thung.

Lungawina

England ramah khua a lum lai a ni a, Pathianni tlaiah erawh boruak lum tak karah ruah a tla; car intlansiak tan chuan ngaihtuahna hman uluk a ngai lehzual tihna a ni a, safety-car pawh a tlan luh zauh zauh a ngai hial.

Safety-car tlan lut hi Norris tan vanneihna a ni thung, a teammate Piastri chu intlansiak tawp lamah dan a bawhchhiat avangin 10-second penalty pek a ni a, hetiang boruak karah hian Norris erawh chiai miah loin a tlan tluang a, hnehna a chang thung a ni.

British GP-ah a vawi khat nan a chak a, Norris a lungawi hle. British tlangval chuan, "Champion tuma inelna a pawimawh a, chumi bakah chuan mahni ram ngeia hnehna chan chu a hlu bik hle, ka dam chhungin ka hrereng tawh ang," tiin a sawi.

McLaren driver pahnih Norris leh Piastri te hnungah Nico Hulkenberg chu thlengin pathumna a ni. Hulkenberg hi kum 37 mi a ni tawh, car intlansiakna sang berah hian vawi 239 a inlan tawh a, dawhsan a lawn phak chinah a awm vawi khatna a ni hial.

Sauber car khalhtu Hulkenberg hian podium rap turin hun a mamawh rei ngar ngar hle mai a, a sang zual pathum zinga tel tura intlansiak hmachhawn hnem ber a ni hial, a tawpah erawh a hun a thleng ve ta a ni.

Lewis leh Max

Silverstone tlankawng hi Lewis Hamilton tana hmun ṭha bik, sulhnu ṭha tak a neih tawhna hmun a ni a, kuminah pawh season hmang ṭha lo mah se a chak leh mai rinna a lian - mahse Ferrari driver hi palinaah a lungawi a ṭul ta zawk.

World champion vawi sarih ni tawh Hamilton chuan, "Khaw awmdan leh kan car hman khan inrem lohna lai a nei a, chuvangin duh ang taka chet a harsa," a ti. British GP-ah hian vawi kua a chak tawh a, kuminah chak lo mah se record a nei ṭha fal hle.

Max Verstappen pawh a season hman ṭhat tawk lohna aṭangin a la tho chhuak thei rih lo. Red Bull driver hi palinaah a thleng a, a nomawi kawl lai humhim tur chuan thapui a thawh a ngai tawh dawn, championship lamah McLaren driver pahnih hnungah a awm.

Dutch tlangval Verstappen chuan, "Tlankawng huh a ni tih kan hria a, chumi hmachhawn tur chuan kan inbuatsaih dan a ṭha tawk lo," a ti. World champion vawi li ni tawh hian season hmasa aṭang khan team chet fuh lohna a sawi zauh zauh tawh a ni.

Car intlansiakna sang ber hi season chanve an hmang zo a, chawlhkar thum chhung nipui chawlh an hmang ang. Season chawhnu lam bul ṭan turin July 25-25 chhung hian Spa-Francorchamp-ah Belgian Grand Prix tlan turin an lo let leh ang.