AIFF-in hmeichhe team lawmpui

All India Football Federation (AIFF) All India Football Federation (AIFF) chuan tun hnaia AFC Asian Cup 2026 khel tura tling, Indian football hmeichhe team chu lawmpui nan US dollar 50,000 an pek tur thu an puang a, hei hi India pawisa chuan cheng nuai 42.98 a ni.

AFC Asian Cup 2026 khel lo thei dinhmuna India mipa team an din laiin, hmeichhe team erawh AFC Women’s Asian Cup 2026, Australia-a khelh tur atan an inpetkai thung a, Inrinni khan Thailand chu 2-1 a hnehin, Australia-a inelna hmachhawn tur hian ticket an la fel a ni.

India hi qualifier-ah hian group B-ah an awm a, team panga awmna aṭangin hmahruaitu chauh tlang tur an ni. Mongolia (13-0), Timor-Leste (4-0) leh Iraq (5-0) an sawp hnuah, Inrinni khan a thlengtu Thailand nen an intum.

Thailand nen hian point hmuh zat a inang chiah a, goal difference-ah ṭha zawk an awm lo bawk - a chak zawk tan Asian Cup khelh tur niin, India tan Sangita Basfore chuan goal hnih a khung a, East Bengal midfielder goal khung kara Thailand tana Chatchawan Rodthong goal khungin awmzia a nei phak lo.

India hmeichhe team tan hei hi record thar a ni a, Blue Tigresses hian qualifier awm hmain Asian Cup khel ṭhin mah se, tun hi qualifier awm hnua an inpettling hmasak ber a ni - kum 2022 khan inelna thlengtu angin tling mah se, Covid-19 avangin team pumpui an inhnukdawk leh a ni.