Fenerbahce-in Duran la lut

Jose Mourinho enkawl Fenerbahce an inthuam ṭha zel a, Al Nassr striker Jhon Duran chu season khat chhung an hnena khel turin loan-in an la lut.

Duran hian January khan Al Nassr a zawm ve chauh a, Aston Villa aṭangin Saudi club hi pound maktaduai 71 ngawtin a zawm - match 18 a khelhah goal 12 a khungsak nghal a, mahse, thla ruk hnu lawkah a chhuak!

Fenerbahce chuan thuchhuah siamin, "Jhon Duran-a'n kum khat chhung kan club tan loan-in a khel dawn a, club leh player te kan inrem tawh. Fenerbahce jersey ha chunga season duhawm tak a hman kan beisei," an ti.

Kum 21 mi Durán hian January 2023 khan Chicago Fire aṭangin Aston Villa a zawm a, hetihlaia a man zat hi £18mtd a ni. Villa tan match 78-ah goal 20 a khung hman a, mahse, heng zinga match 61-ah hian bench aṭangin a lut - England striker Ollie Watkins a nek chhuak thei tlat lo.

A tawpah Arab sum mawm chawm turin Saudi a pan a, mahse, thla ruk bak a peih lo - tunah chuan Jose Mourinho enkawlna hnuaiah a khel dawn a, Turkish Super Lig-ah a hming chher a beisei ang.

Colombia tan vawi 17 inlana goal thum khung thei striker hian season hman zawh takah khan Al Nassr chu Saudi Pro League-ah pathumna a nihpui a, Fenerbache hian Turkish top flight league-ah Galatasaray phak loin pahnihna an ni thung.

Colombian striker hian Al Nassr-ah hian kar khatah £320,000 a hlawh mek a, Fenerbahce hian a hlawh zawng zawng hi an pe vek dawn niin an sawi - Turkish club hian Fiorentina aṭangin season hmasaa loan-a an hawh Sofyan Amrabat chu a nghetin an la lut tawh bawk.