Forest-in Jesus an la lut

Europa Conference League khel tur Nottingham Forest chuan Botafogo aṭangin striker Igor Jesus an la lut a, a man atan pound maktaduai 10 vel insengin, kum li atan contract an ziahpui.

Jesus hian Botafogo hi Club World Cup-ah khan last 16 luhpuiin, rin loh taka Paris St-Germain an hneh ṭumin inkhela goal awmchhun a khung nghe nghe.

Forest hian kum 24 mi Jesus hi rei tak an lo en thla tawh nia sawi a ni a, season hmasa khan Botafogo chu Brazilian Serie A leh Copa Libertadores-ah champion nomawi a chawipui.

Brazilian football season kal mekah match 28 khel tawhin goal kua a khung a, assist vawi khat a nei. Brazil tan vawi li khel ve tawhin, nikum October khan ram tana a match hmasa ber chu Chile lakah khelin, goal a khung nghal.

Jesus chuan, "Club duhawm tak Nottingham Forest-a ka hringnun bung thar ka kai thei tur hi ka lawm hle. Forest zawm tur hian ka inngaihtuah buai lo a, club hmachhawpten min tiphur hle - hna ṭha tak ka thawh theih ka beisei," a ti.

Brazilian striker hian UAE Pro League club Shabab Al Ahli tan pawh lo khel tawhin, match 92-ah goal 46 a khung a, UAE football-a nomawi chawi theih ang chu a chawi kim.