Gold Cup champion Mexico

CONCACAF Gold Cup final-ah USA an tlawm - NRG Stadium, Houston-a inkhelah US hian Mexico lakah goal khung hmasa zuk mah se, inkhel a zawh meuh chuan 2-1 in an tlawm.

Nimin zinga inkhelah US hian minute lina lekah goal hmahruai an khung a, Crystal Palace defender Chris Richards chuan Sebastian Berhalter-a freekick aṭanga ball kal chu a tauh lut a, 1-0 a ni.

Mahse, US hmahruai chhung a rei lo - minute 23 a liam a, Raul Jimenez chuan si phurh a sut. Fulham striker-in si phurh a sut theihna tura Marcel Ruiz ball pek a mawi a, 1-1 a ni.

Jimenez hian Wolverhampton Wanderers tana a khelhpui ṭhin, tun hnaia thi Diogo Jota tan a goal khung hi a hlan zui a, Jota hming chuanna jersey 'Diogo J 20' tih inziak chu pho chhuakin, Portuguese forward-in a goal khung a lawm ṭhin dan angin a lawm bawk.

Goal dang lut loin chawlhlawk hman zui a ni a, second half-ah Mexico-in inkhel an thunun zui - West Ham defender Edson Alvarez chuan chakna goal a khung.

Mexico captain Alvarez goal khung hi a tirah offside vangin pawm a ni lo zet a, mahse, video assistant referee (VAR) a inrawlh hnuah offside loa ngaih niin, goal hi pawm a ni a, Mexico an champion zui.

Gold Cup-ah hian North & Central America aṭangin ram 15 an inlan a, Saudi Arabia chu sawm bik angin an inlan bawk - inelna hi match khat chu Canada-ah khelh ve niin, a bak zawng chu USA-ah khelh a ni.

US hian Canada leh Mexico te nen World Cup 2026 an inthlen ṭawm dawn a, hemi atana an dinhmun enchhinna ṭha tak chu Gold Cup hi niin, mahse, Mauricio Pochettino hoin an champion zo lo.

US hian final lut turin Trinidad and Tobago, Saudi Arabia, Haiti, Costa Rica leh Guatemala te an hneh a, mahse, a hmawr an bawk thei ta lo - Poch tan World Cup atana inbuatsaihna ṭan lehnghal a ngai.

Gold Cup hi vawi 18 khelh tawh niin, Mexico tan vawi 10 an champion-na niin, US hi vawi sarih an champion thung a, Canada chu vawi khat an champion ve tawh.