German Cup final an sawn
German Football Association (DFB) chuan Covid-19 vangin German Cup final khelh hun tur an sawn, inelna hmawr bawk hun tur hi tunah chuan tih chian theih a la ni lo.
Ruahmanna hmasaah chuan German Cup final hi May 23 hian Berlin khawpuia awm Olympiastadion-ah khelh tur a ni. Mahse hri leng vangin German football an chawl mek a, an tum angin thil a kal thei rih lo a ni.
German Cup-ah hian team pali chiah an dam tawh. Semifinal-ah Bayern Munich leh Eintracht Frankfurt an inhmachhawn dawn a, semifinal lehlamah FC Saarbrucken leh Bayer Leverkusen te an inkhel thung ang.
German Football Association (DFB) president Fritz Keller chuan, "DFB-Pokal final hi season dang chuan boruak nuam tak hnuaiah ropui taka khelh ṭhin a ni, kuminah pawh hian Berlin khawpuiah inkhel hmuhnawm hmuh kan beisei kha a ni a.
"Amaherawhchu, kan thunun phak loh thil a thlen miau avangin duh thlan tur dang kan nei rih lo. A hmawr bawkna neih hmain semifinal khelh hmabak a la awm bawk, a tawpna siam hun tur hi sawi theih a ni ta rih lo," tiin a sawi.
DFB hian Bundesliga chu May 9 aṭang hian entu awm loa khelh chhunzawm leh an tum a, league hi an kaltluang a nih chuan June 30-ah an khel zo ang. German ramah hian nimin tlai thleng khan hri leng vanga thi mi 5,700 chuang an awm tawh.