Premier League club bihchianna Unsworth, Howard, Cahill, Baines...

Everton chanchin sawi chuan Tim Howard, Duncan Ferguson, Tim Cahill, Leighton Baines, Phil Jagielka, Leon Osman leh David Unsworth te hming sawi hmaih a thiang lo a, goal khung theih vangin Romelu Lukaku hming lamrik pawh a ṭul awm e.

Premier League awm hnuah tu nge ropui ber tiha sawi erawh chuan David Unsworth hming hi Everton ṭantuten an lam hmasak tur a ni. Unsworth hi kum 2019 khan Everton 'Giants' atan dahluh a ni a, kum khatah pakhat zel chauh dahluh ṭhin an nih avangin Premier League khel zingah chuan English defender hi a hmasa ber a ni.

Kum 46 mi Unsworth hi Everton aṭanga inzir chuak niin 1992 aṭanga 1997 thleng a khelh hnuah West Ham United a zawm a, amaherawhchu Hammers-ah hlawhtling loin Aston Villa-ah chhuak zawkin 1998-ah Everton-ah bawk a let. Unsworth hian 2004 thleng Everton a khel a, tunah erawh manager ni tawhin club youth team a enkawl tawh a, 2016 leh 2017 khan senior team a enkawl lailawk tawh bawk. 

Kum 1995 khan Everton-in Sir Alex Ferguson-a kaihhruai Manchester United chu FA Cup final-ah 1-0 in an hneh a, nomawi an chawi. Hemi ṭuma Toffees defender pawimawh chu Unsworth hi a ni a, FA Cup nomawi hian a hlutna a tisang sawt.

Premier League-a Everton tana inlan hnem chu American keeper Tim Howard (354), Leon Osman (352), Leighton Baines (345), Phil Jagielka (322), David Unsworth (302) leh  Seamus Coleman (265) te an ni.

Timothy Matthew Howard hi March 6, 1979 khan North Brunswick, United States-ah a piang a, 2003-2007 chhung khan Manchester United tan khelin season tawp berah hian loan hmangin Everton-ah a kal. 

American keeper hian Everton hi pound maktaduai 3-in 2007 khan a zawm a, 2016 thleng a khel. Howard hi kum 41 mi a ni tawh a, USL Championship club Memphis 901-ah a la inziaklut a, club neitu zingah a tel bawk. Howard hian Everton nomawi a chawipui lo a, amaherawhchu 2008-09 khan FA Cup final a thlenpui.

Leon Osman hi May17, 1981 khan Wigan, England-ah a piang a, Everton academy aṭanga inzir chho niin Carlisle United leh Derby County-ah loan hmangin a chhuak tih loh chu Goodison Park-ah hian a hun pum a hmang. 

Osman chuan, "Min sawm duh suh u, Everton chhuahsan ka duh lo," tiin club tana a rinawm thu a chhak chhuak tawh a, 2015–16 season tawp rual khan a contract zoin Everton-in a chhuah a, football khelh a chawlhsan. Kum 38 mi Osman hian Everton tan match 352 zet a khel a, England tan pawh vawi hnih a inlan a ni.

Leighton Baines hi Everton ti Everton tu tiin a sawi theih. Baines hi December 11, 1984 khan Kirkby, England-ah a piang a, kum 2007 khan Wigan Athletic aṭangin pound maktaduai 5-in Everton a zawm. Kum 35 mi tun thlengin Everton tan a la khel a, left back nichunga set piece leh penalty specialist a nih avangin lawm a hlawh a, assists vawi 53 nei tawhin club tana assists ngah ber a ni.

Australia tana match 108 zet kheltu Tim Cahill-a'n Everton-ah sulhnu ṭha tak a hnut chhiah a, Premier League-ah ringawt goal 56 a khungsak. Kum 40 mi Cahill hian football khelh a chawlhsan tawh a, ISL club Jamshedpur-ah a hun tawp a hmang.

Everton tana Premier League-a goal khung tam ber chu Romelu Lukaku a ni a, Belgian striker hian goal 68 zet a khung. Kum 26 mi Lukaku hian beiseina sang tak nen Anderlecht aṭangin Chelsea a zawm a, Blues-ah a khelh phak loh avangin Everton-ah a intuai hriam. Lukaku hian Toffees tan season li chauh khel mah se Premier League-ah goal 10 a khung tling vek a, club chanchinah hmun pawimawh a chang pha.