Dutch league an titawp: Premier League a chiang lo?

Coronavirus hrileng vangin infiamna khawvel a chawl ṭhuap a, UEFA-in kar hmasa khan league khelh zawh hram duh mah se a harsa bikah inhriatthiamna a awm tur thu an sawi. 

UEFA ṭhutkhawm hma aṭanga league tihtawp lo rilruk tawh Dutch FA-in thutlukna siamin league an titawp ta a, champion leh relegate awm loin season hi an khar.

Eredivisie tihtawp a nih rualin Premier League tawp ve mai hlauhthawnna a ri nghal a, Liverpool fan-te thin thiin an awm thei ta meuh lo - Dutch FA president Just Spee chuan, "Hmun dang tan pawh league kaltir zel a harsa ang," a ti!

Dutch FA hian anmahni thuin thutlukna an siam mai bik lo - league sang ber Eredivisie-a club 18 leh second division (Eerste Divisie)-a club 20 zinga 16 (club pali dang hi Eredivisie reserve team an nih avangin vote an nei lo) te ngaihdan a la. 

Club 34 zinga 16 chuan Eredivisie tan promotion leh relegation awm ngei se an ti a, a bak pakuain tihtawp tawp an duh a, a dang pakuain Dutch FA thutluknaa innghah mai an duh thung.

Vote a darhsarh tak avangin Dutch FA-in an duh angin thutlukna an siam a, promotion leh relegation awm loin leagut tihtawp a ni - Eredivisie-ah hian Ajax chuan table chung ber luahin hma an hruai mek a, an hnuai chiaha awm AZ Alkmaar nen point hmuh zat inangin an san zawkna chu goal difference-ah chauh a ni. 

Second division-ah hian hmahruaitu Cambuur chuan point 11 ngawtin hma an hruai fal a, season thum ngawt Eredivisie an khelh tawh loh hnuah kir turin beiseina an nei - mahse tihtawp a ni ta si. 

Dutch football association (KNVB) thutlukna hi Eredivisie mawng lama awm PEC Zwolle, Fortuna Sittard, ADO Den Haag leh RKC Waalwijk te ho tan chuan chanchin lawmawm a ni ang a, Cambuur tan erawh lungawi lohna tur hlir a ni thung ang. 

Cambuur coach Henk de Jong chuan, "Dutch infiamna khawvela inzah lohna lian ber a ni a, he thutlukna hian infiamna khawvela hmun chan ve a phu lo," a ti a, a thinrimna hi a hriatthiamawm hle. 

Dutch second division hmahruaitu club general director Ard de Graaf chuan, "Kan dinhmunte kan zirchiang ang a, tih theih kan neihte kan en ang," a ti a, court lama an zualko mai theih thu a sawi. 

Eredivisie-a parukna Utrecht pawh an lungawi lo - anni hian match khata khel tlemin point thum lekin pangana Willem II an phak lo a, Dutch Cup final khelh an hmabak bawk. Utrecht hian court-a an kal tur thu an sawi a, Europa League-a an hmun tur pek an ni lo chu an lungawi lo. 

Dutch FA thutlukna ang chuan league-a a sang pahnih Ajax leh AZ Alkmaar ten Champions League qualifying stage an khel dawn a, Feyenoord chu Europa League group stage-ah an inlan thung ang - Ajax hi tun season Champions League result leh tualchhung league dang result a zirin group stage an luh nghal theih dan a awm bawk. 

PSV chuan Europa League qualification third round aṭangin an khel ṭan ang a, Willem II chuan second qualifying round aṭangin an khel bawk ang - hei tak hi Utrecht lungawi lohna a ni. 

Utrecht hian Dutch Cup final an hmabak bakah Willem II nen an inthlauhna a tam loh avangin season thara European football khelhna chance an nei sang hle - mahse season tihtawp a nih takah chuan an beiseina zawng zawng a thamral zui. 

Hriat tel tur erawh Dutch FA thutlukna hi pawm nghal tur tihna a ni kher lo - UEFA chuan thutlukna hi uluk takin a enfiah leh ang a, a ṭha tawk loa a hriat chuan a pawm lo thei dawn a ni. 

KNVB thutluknain sawi zui a hlawh a, hemi karah hian Dutch FA president Just Spee chuan European football-a league dang tan pawh season khelh chhunzawm chu thil harsa tak a nih tur thu a sawi. 

Dutch league hian match kua khelh tur an la nei a, league match kua khelh tur nei ve tho Premier League hi engtinnge an kal zel dawn tih chu fan-te rilrua zawhna lo awm a ni a, chhanna erawh a awm thei chuang lo. 

Spee chuan, "Kan dinhmun leh UK dinhmun hi a danglam tam lo. Beiseina chu an nei reng a, mahse beiseina neih rengna chi a ni em tih pawh inzawh a ṭul. Hei leh chen hi kan nghak tawh a, kan thlen chin chu kan hria a ni. 

"Premier League hian season titawp turin match lo khel dawn ta pawh ni se, inkhel zo turin kar engemaw zat an la mamawh cheu dawn - an mamawh ang zat hun an nei thei ang em? Kei chuan ka ring lo," a ti a, Premier League season chu khelh zawh theih a nih a beisei lo hle.