Ball ruka run ruk! Yuvraj-a'n nunhlui a chhui kir

September 2007 khan World Twenty20 super eight match-ah India leh England inhmachhawn a, tun hnua T20 World Cup tih tak inelnaa England nena an inkhelah India hian over 18 chhungin run 171 an siam a, wicket thum lek an hloh. 

India che ṭha lutuk tih khawtlai dan tur Andrew Flintoff chuan a ngaihtuah a, English all-rounder hian hetihlaia batsman ṭhangduang Yuvraj Singh chu auh zam theih inbeiseiin ngeiawm takin a ṭawngkhum. 

Flintoff hian kum 25 mi lek Yuvraj hi a au zam dawn emaw a inti a, a lo ni lo nasa - Yuvraj a phur zual sauh a, a tuartu chu hetihlaia English bowler tuaitir Stuart Broad a ni. 

Yuvraj hian Stuart-a ball vawi ruk a hmachhawnah run 36 ngawt a siam a, Twenty20 inelnaa a vawi khat nan ball ruk a hmachhawna ball tinah six run a vaw chhuak - 'a pui' tih hian hrilhfiah zawh chi a ni lo, India ram pumpui chu lawmin an au a ni ber. 

Khawvela bowler ṭha ber pawl ni ta Stuart Broad hian a hun tawn thim thlirkir se, Yuvraj lakah a chetchhiat hi a tel ngei ang - a bul ṭantu erawh Flintoff a ni a, English all-rounder ṭhin hian hlim takin he hun hi a thlirkir bik ring suh. 

Yuvraj chuan, "Freddie (Flintoff kohna) khan a tih ṭhin dan angin a rawn ti a ni mai, thu eng eng emaw a rawn sawi a, ka lo chhang ve bawk," a ti a, Flintoff ṭawngkam chuan phuba lak duhna thinlung a put tir thu a sawi. 

September 19-a team pahnih intawn hma hian ODI match-ah September 5-ah an intawng a, hemi ṭum hian Yuvraj hi ball ruk a vawmah Dimitri Mascarenhas chuan a sawisa - ball ruk a vawma ball ngaah six run ṭheuh a lo vaw chhuak!

Kum 38 mi Yuvraj chuan, "T20-a kan inhmachhawn hma lawk khan ODI-ah England hmachhawnin Dimitri lakah ka lo mualpho tawh a, England laka over khat ball tina run ruk ka vaw chhuak thei kha ka lawm takzet. Over a zo chiah kha Freddie lam ka en a, a hnuah Dimitir ka ve en leh a, a lo nui a ni," a ti. 

Cricket khawvelah bowler tan over khat ball vawm tina run ruk insiamsak aia innghaisakna lian zawk a awm thei lo a, Broad tan chuan zan tam tui lo taka mutna tham a ni. Mahse, Yuvraj hian Broad a hnem zui. 

Yuvraj chuan, "Stuart-a pa Chris Broad chu match referee a ni a, a tukah min hmu turin a rawn kal a, 'Ka fapa career i tihtawpsak thawthang a ni ber a, i hming 'sign' chuanna jersey i pek a ngai a ni,' a rawn ti," a ti.

 

Yuvraj hian infiammi rilru dik tak pholangin Stuart hi a jersey a pe zui. Indian batsman ropui zinga lam hmaih ni tawh ngai lo tur chuan, "India jersey chu Stuart tan ka pe a, 'Over khat ka vawma ball ngaah chuan ball tinah run ruk min vuaksak tawh a, i rilru tur ka hrethiam a ni. England cricket hma hun ni turin ka duhsakna sang ber ka hlan,' tih ka ziak tel. 

"Tunah chuan Stuart hi khawvela bowler ṭha ber pawl a ni tawh. Indian bowler zingah a hun tawn ang kha tawng a, tho chhuak leh thei tur ka hre lo," a ti a, Stuart-a rilu paukhauhna chu a fak. 

World Twenty20-ah hian India-in final an lut zui a, Pakistan hnehin nomawi an chawi - England nena an inkhelah khan Yuvraj hian ball 14 lekah run 58 a siam a, England hian run rawn siam ve viau mah se India run siam 219 chu run 18-in an umpha lo. 

Yuvraj chuan, "Coronavirus vangin India chuan lockdown kan kalpui mek a, TV lamin kha inkhel kha an pekchhuah nawn reng avangin Flintoff chu India-ah chuan celebrity a ni mek a ni," tiin Flintoff hi a kap leh hram!