Silly Point : O Lord's chaw ṭhing a lo dai e!

Khatia Professional Cricket kan chawlhsan ve tak hnu a, awm khawhar hunawl ngah ta chu. Inzirzau zel duhna vangin 2022 kum khan football club lar tak mai FC Barcelona, Spain lama an Sports Sikulah, Sports Psychology thla li course zir turin kan inziak lut ve rawih a nih kha.

Zawhna a tam a, mahni tawnhriat leh mi ril bik te thu zirtir nen, a harin kan va hlawkpui ṭhin tak. A huhoa sawihona hun kan hman ṭuma ka thusawi zawk hi a ni thailan ka tum ber zawk chu a ni. Cricket anga team intihsiakna, team anga thawhho ngai vek si, mahse mimal (individual) infiamna ni tel tlat bawk si hi baseball nen hian infiamna dang hi a awm kher lo ang, ka ti a.

Kan zirtirtu leh ka zirlaipuite hi football, tennis, athletics background an ni deuh vek, mahse khami ni kha chuan ka thusawi hi min ṭawmpui viauin ka hria. Batsman pangain century siam mah se, hnehna chan ngei ngeina a lo ni chuang lo. Tu emaw wicket 10 lak avanga mi pakhatin team chakpui vek thei a ni lawi si.

Cricket Mecca - Lord's

Cricket inpui Lord's, London hi mit ngeiin ka lo zuk hmu ve tawh a, khelmual dang aiin a zauin, mipui ṭhutna a tamin, a stadium hrim hrim hi a ropui a ni lo a. Mahse amah hian huhang hi a nei ve hrim hrim a, cricketer tawh phawt chuan vawi khat pian ve manah an inkhelh chakna ber khelmual a ni pawh hi thil mak a ni lo.

He ground danglamna em em chu a khelmual a awih tlat hi a ni a. Pavilion tawp aṭanga ral lehlam Nursery End hi meter 150 a inhlat a ni a. Pavilion End hmar lam aṭanga chhim lam Nursery End insan hleihna hi feet 8 leh inchi 2 a ni a, chu chu a saisir zawng deuha inawih hleih a ni .

Deep mid wicket boundary a fielder ding leh a ral lehlam meter 130 vela hla deep point boundary a ding te chu an inhmuthei lo tihna a ni ber awm e. Chumi avang tak chuan pitch pawh hi a vang zawngin inchi 2-3 laiin a insan hleih ta a.

Pavilion End aṭanga ball vawm chuan, ding zawnga bat hum te tan, amah leh amahin ball a chhuak zawngin vawm nghal (out swing/seam). Chutiang chiah chuan Nursery End aṭanga ball vawm tan, ding zawnga bat hum tan, ball kha a lut zawngin (in swing/seam) a kal nghal hrim hrim ṭhin tihna a nih chu.

Aw phaitual hnim

England ho Bazball tactic chu ṭha viau mah se famkim lohna khawvel tih takah, a chaklohna lai tak chu India team te tan malsawmna a ni ti khawvelin a hmu chiang ta a. Bazball chuan pitch ṭha leh ni nga awh tur, batsman-te tan duhthusam a phut tlat avangin, an tactic hmanthiam ngei chu England tan Edgbaston inkhelah kha chuan an tlakchhiatna a ni lawi si.

Inkhelh hma ni thleng hian Lord's pitch report kan hriat theih chinah chuan, phaitual hnim a hring tuarh mai tih a ni a. England lam chuan English cricket ze diktak zawk, seam leh swing tamna a let lehin, chaw thing an herlum a ngai ta hial a nih hi maw. Heti a nih tak siah chuan, a khelmual inawih hleih bawk nen, seam & swing, ball kal kawi zawk zawk kan hmu leh turah ngai ila. Fast bowler te tan chanchinṭha a ni tawh mai awm e.

India lam hi

Vawi nga inkhel turah 1-1 niin a thawh thumna pawimawh tak mai a ni dawn a. Pitch hring kalh maiah Jasprit Bumrah lo let turah ngai ila, Akash Deep leh Md Siraj te nen an pathum hian bowling department mawhphurna chang turah dah ila, an thachhangdal turin all rounder Nitish Kumar, Ravindra Jadeja leh Washington Sundar a te awm lehin.

Batsman panga Jaiswal, Rahul, Karun Nair, Shubman Gill leh Rishab Pant te an nih leh mai loh chuan. Karun Nair erawh run 20-30 ṭha deuh rawn siamin, score lian tham siam lo mah se, hun la pek a phuin ka hria.

England lam ve thung

England batting line up lamah thlak ngai an awm lem lo a, an pacer pathum Brydon Carse, Josh Tongue leh Chris Woakes te hian tun test pahnih khelh chhung khan over 80 dawn ṭheuh vawmin, wicket an la hleithei lo.

England pacer-te hi hahdam tir a ṭul dawnin a lang a, chutihrualin India-in Jasprit Bumrah leh Akash Deep a te meialh chu meialh bawka chhanglet a ṭul. Hemi a nih avang hian damkawr hlim mah nise Jofra Archer leh Gud Atkinson te an telh luih ngei ngei a ngai ang.

Cricket Mecca-ah Blockbuster Test inkhel en thei turah inngai ang.