Leeds-ah Gudmundsson a khel dawn

Premier League kaithar Leeds United chuan Lille left back Gabriel Gudmundsson chu pound maktaduai 10-in an la lut a, Elland Road-ah kum li khel turin contract a ziak.

Kum 26 mi Gudmundsson hian Swedish club Halmstads BK aṭanga a professional zinkawng zawh ṭanin, Dutch club Groningen tan a khel zui a, kum 2021 aṭang khan Lille tan a khel ṭan.

Ligue 1 club tan match 137 khelin, goal li a khung a, assist vawi thum a nei bawk. Season hman zawh takah khan inelna hrang hrangah match 45 khelin goal hnih a khung a, assist vawi khat a nei.

Gudmundsson hi centre back leh winger ang pawhin chhawr theih a ni a, season hman zawh takah khan Champions League match kua khelin, Lille chu last 16 a luhpui.

Season hman zawh takah khan Lille hian Ligue 1-ah goal 36 chiah chhuahin, goal chhuah tlem lamah Paris St-Germain chiah an phak lo a, Gudmundsson hi tlarhnungah a thawhhlawk hle.

Sweden tan vawi 15 a inlan tawh a, a pa Niklas Gudmundsson pawh footballer ṭhin tho niin, Blackburn Rovers leh Ipswich Town tan a lo khel tawh a, a pa hnung zuiin Premier League club tan a khel ve dawn ta.

Leeds hian tlarhnung thuam ṭhat an tum hle. Gudmundsson hma hian Udinese centre back Jaka Bijol leh VfL Wolfsburg centre back Sebastiaan Bornauw te an la lut tawh a, tlarhmaah Wolfsburg-a contract hmang zo hlim Lukas Nmecha an la lut tawh bawk.