Liverpool-ah ka hlim - Diaz

Luis Diaz chuan Liverpool-a a hlim thu a sawi chhuak a, Reds ṭantute tan ngaihṭhat phahna tur erawh a ni lo - Barcelona, Bayern Munich leh Al Nassr-in an duh forward hian a tana ṭha ber tura thutlukna a siam tur thu a sawi.

Diaz hi tun hnaiah Diogo Jota vuinaa a kal loh avangin dem a hlawh a, a ṭhianpa an vui lai hian Colombia lama party-na velah hun a hmang niin an sawi - hei vang hian Kop ho zingah pawh a chhuah pawiti lo an awm nual tawh.

Hetiang boruak karah hian Diaz hi chhuak tura sawi a ni reng a, mahse, Liverpool chuan amah lak tumtu Barcelona leh Bayern chu an player chu zawrh lai a nih loh thu hrilhin an hnar tawh thung.

Diaz tan ngawih hun tak a nih laiin a ṭawng chhuak leh a, Colombian forward chuan, "Liverpool nen inbiakna kan nei mek a, kei leh club-in kan tih theihte kan en dawn a, a ṭha thei ang bera thutlukna siam kan tum.

"Min dawrtute pawh kan be vek a, mahse, tuna ka awmnaah hian ka hlim a, ka chi ai lo. Ka tana ṭha tur bera thutlukna siam ka tum a ni," a ti.

Diaz hian January 2022 khan Liverpool hi a zawm a, hetihlaia a man zat hi pound maktaduai 37.5 niin, a khelh ṭhat dan a zira pek belh tur hi £12.5mtd a ni.

Liverpool tan hmun pawimawh chang nghalin, season hman zawh taka Premier League champion an nih theih nan a thawhhlawk hle - inelna hrang hrangah match 50 khelin goal 17 a khung a, assist vawi riat a nei bawk.