Botafogo coach thar Ancelotti

Brazilian club Botafogo chuan Carlo Ancelotti fapa Davide Ancelotti chu an coach thar atan an la lut a, 2026 season tawp thleng a enkawl ang - Brazil-ah chuan football season hi April-ah inṭanin, December-ah a tawp ṭhin.

Ancelotti pawh hian December 2026 thleng chu Botafogo hi a enkawl dawn tihna a ni a, hetihrual hian World Cup 2026-a Brazil kaihruai tur, a pa Carlo Ancelotti pui turin World Cup-ah erawh Brazilian Serie A club hian an coach hi an chhuah zalen ang.

Kum 35 mi Davide Ancelotti tan head coach anga a hna hmasa ber tur a ni dawn. Kum 2011 aṭang khan a pa kaihhruaina hnuaiah thawk ṭanin, Paris Saint-Germain leh Real Madrid-ah fitness coach angin a thawk phawt.

Hemi hnu hian kum 2016 khan Bayern Munich-ah assistant coach a ni a, a pa hnung zui zelin, Napoli, Everton leh Madrid-ah te assistant coach hna a chelh zui a ni.

Botafogo hian kum 2024 khan Serie A nomawi chawiin, South American Champions League Copa Libertadores-ah a vawi khat nan an champion bawk a, mahse, January khan coach Artur Jorge chuan a chhuahsan.

Coach tawnhriat nei ṭha Renato Paiva ruai zui mah se, beisei an phak lo a, Club World Cup last 16 aṭanga an tlak hnuin an inṭhen - tunah chuan an ram coach fapa Davide Ancelotti an la lut a, hmasawn an inbeisei ang.