Sunderland-in Reinildo la lut

Championship aṭanga Premier League kai thar Sunderland chuan Atletico Madrid-a contract hmang zo hlim, defender Reinildo Mandava chu free transfer-in an la lut a, kum hnih atan contract an ziahpui.

Kum 31 mi left back hian kum 2022 khan Lille aṭangin Atletico hi a pan a, beisei ang erawhin hmun a chang tam tawk lo. Spanish club tan hian match 103 khel hmanin, goal hnih a khung bakah, assist vawi khat a nei.

Mozambique international chuan, "Premier League-a khelh hi ka tum ber ṭhin a nih avangin ka tan chuan mumang thleng dik ang mai a ni a, sulhnu nei hraw tak Sunderland tana khelh ka châk tawh hle," a ti.

Lille tana Ligue 1 nomawi lo chawi tawh fullback chuan, "Ka ṭhian tharte nen inhmuh a, he team tana theihtawp chhuah ka châk tawh takzet a, team tana ka tawnhriat hman ṭangkai ka duh. A pawimawh berah chuan mipui hlimna thlen ka duh a, chumi ti tur chuan theihtawp ka chhuah ang," tiin a sawi.

Black Cats hian Reinildo hi tun nipuia player an lak palina a ni a, a hma hian midfielder Noah Sadiki (Royale Union Saint-Gilloise, £15mtd), Enzo le Fee (AS Roma, £19.3mtd) leh Habib Diarra (Strasbourg, £30mtd) te an la lut tawh.