Arsenal tana UCL khelh ka châk - Norgaard

Christian Norgaard chuan Brentford tan thil ropui leh ṭha tak tak tih theih mah se Champions League khelh erawh theih loh a ngaih niin a sawi, a club thar Arsenal tan erawh European football inelna sang ber an khel tur chu a naupan lai aṭanga a duhthusam niin a sawi bawk.

Brentford midfielder a ni ṭhin a, captain a ni bawk - Norgaard hian Arsenal chu kum hnih chhung atan a zawm a, pound maktaduai 15 man niin an inremna hi season khat dang atan pawhsei leh theih tura tih a ni.

Denmark international midfielder Norgaard chuan, "Brentford nen khan thil mak chu tih theih a ni, mahse a nihna takah chuan Champions League khelh chu thil theih loh tluk a ni thung a, tuna hun remchang ka nei thei hi bawhpelh chiah ka ngai lo.

"Champions League khelh hi ka duhthusam a ni ṭhin a, a rimawi leh kalhmang ringawt pawh hian lung a ti leng ve ṭhin. Tunah atak ram a chang dawn ta, naupan laia ka suangtuah leh duhthusam neih ṭhin kha a tak ram a chang dawn ta a ni," tiin a sawi.

Norgaard hian English football huangah tawnhriat a ngah tawh - kum 2021 khan Brentford chu Championship aṭangin Premier League a kai pui, chumi hnuah Bees tan hian EPL match 122 a khelhsak leh tawh bawk a ni.

Arsenal hian nipui bazarah Real Sociedad aṭangin Midfielder Zubimendi an lei tawh a, captain Martin Odegaard leh Declan Rice te an nei sa bawk; Jorginho erawh a chhuak thung a, tawnhriat nei ngah Norgaard an la ve thung.

Norgaard hian tharum a ngah a, khingpuite ball chhuhsak bakah hma zawnga kalpui thei chi a ni. Mikel Arteta chuan, "A theihna hi EPL-ah fiah a ni tawh a, inbengbel sa leh hruaitu ṭha tak a ni bawk," tiin a player thar chungchang a sawi.

North London club hi nipui bazarah an la buai hle - Chelsea aṭangin Noni Madueke lak tumin an hel mel a, mimal inremna chu an neih pui tawh niin khawtlang chanchinbu te chuan an tarlang a, club pahnih pawh an inrem thei dawn niin a lang bawk.

Kum 23 mi Madueke hi Tottenham aṭanga inzir chhuak a ni a, chumi hnuah PSV Eindhoven a zawn - Dutch club tan kum li leh a chanve a khelh hnuah Chelsea a zawm, Blues tan match 92 khelin goal 20 a khungsak tawh a ni.

England international man hi pound maktaduai 50 aia sang tur niin an sawi a, a man pek dan tur leh contract chungchang erawh thu a ziah fel a la ni lo. Chelsea tan Club World Cup a la khelh mek avangin thu chiang nei turin hun a la mamawh deuhin a rinawm.

Arteta-a'n tlarhma lama chhawr turin Madueke bakah hian Crystal Palace forward Eze leh Sporting striker Viktor Gyokeres te a ngaihven bawk a, inbiakna pawh thui tak kalpui tawh ni mah se thu mum erawh an la nei thei rih lo thung.