Wenger-a'n Klopp a thlawp lo

Liverpool manager hlui Jurgen Klopp-a'n nasa takin FIFA Club World Cup a sawisel a, Arsenal manager hlui Arsene Wenger-a'n a thlawp lo. French manager chuan team, player leh manager telten Club World Cup an thlawp thu a sawi thung.

Klopp chuan, "FIFA thil hmuhchhuah tawhah chuan Club World Cup hi a la fuh lo ber ang," tiin a sawi tawh a, hemi chungchang hi Wenger-a an zawt. FIFA chief of global football development Wenger chuan, "Zawhna ngaihven hlawh tak hi ngaihnawm loh deuhin ka chhang dawn. Mi tupawhin ngaihdan an nei thei a, Jurgen Klopp-a thlirna hi a thlawp lo hrim hrim.

"Kei chuan Club World Cup hi a ṭulin ka hria. Inelna hmachhawn zawng zawng club-te hi zawt ta ula, 100% a ka chian chu inelna kalpui leh a duh ang. Chu chuan inelna hlawhtlinna a pholang. Mipuiin an hlut em tih hi inzawt leh ta ila, mipui pungkhawm tur beisei zat aiin a taka pungkhawm an tam zawk," tiin inelna a hlawhtlin thu a sawi.

FIFA pawhin khaw lum hmachhawn dan a hriat belh phah a, kum 2026-a North America-in World Cup a thlen tur atana inbuatsaihna ṭha tak a ni thei dawn. World Cup 2026 match tawp zawk hi United States a khelh tur a ni a, khelmual (pitch) lamah pawh hmasawnna tur ṭhahnem tak a awm tih hmuh a ni.

Wenger chuan, "Inkhel ṭhenkhatah chuan khaw lum kha buaina tham a ni a, cooling break leh chawlh laia khelmual (pitch) tui pek te khan harsatna a su kian a, thil tam tak kan zir phah. Helai phaitual hnim hi hmun dang nen a inang lo a, a khawng deuh zawk. Tui ka pek hnu khan kan lawm tlangin ka hria," tiin a sawi bawk.

Khawlum hmachhawn dan tur sawi chhunzawmin Wenger chuan, "Nakkumah chuan stadium tam zawkin a chung a nei thei ang a, inkhel hun pawh duh hunah a dah theih ang. Khawlum dan pawh zirchiang turin kan ti a, 35C chuan chak taka tlanin ngawng a nei pha. Hemi sut kian dan tur hi kan zawn a ṭul a ni," tiin a sawi a, Arsenal manager hlui hi FIFA hnuaia thawk a ni a, Club World Cup a fak hi thilmak a ni hran lo.