Liverpool-in Ekitike an ngaihven

Premier League champion Liverpool chuan Eintracht Frankfurt striker Hugo Ekitike chu lakluh tumin an ngaihven niin khawthlang media-ten an tarlang a, Newcastle United, Arsenal leh Manchester United te pawhin Ekitike hi an duh.

Liverpool hian Newcastle United striker Alexander Isak chu an duh ber nia sawi a ni a, mahse, Magpies hian an striker manah hian £120mtd aia tlem dawn an tum lo.

Tun nipui transfer-a £200mtd dawn inseng tawh Reds tan Isak-a man zat hi a sang lutuk hret a, Swede striker an lakluh theih loh tak hlauha lakluh turin Ekitike hi an thlithlai niin khawthlang media-te chuan an tarlang.

Ekitike hian season hman zawh takah khan Eintracht Frankfurt tan inelna hrang hrangah match 48 khelin goal 22 a khung a, assist vawi 12 a nei bawk.

Liverpool hian tun nipuiah Bayer Leverkusen aṭangin right back Jeremie Frimpong (£29.5mtd), attacking midfielder Florian Wirtz (£100mtd + £16mtd), Puskás Akadémia keeper Ármin Pécsi (£1.5mtd), Bournemouth left back Milos Kerkez (£40mtd) leh Preston North End keeper Freddie Woodman (free transfer) te an la lut tawh.

Season hmasaa la lut tura inremna an neihpui tawh, Valencia keeper Giorgi Mamardashvili (£25mtd) chuan tun nipui transfer-ah a zawm ve tawh bawk.