Spurs chungah Forest an lawm lo

Nottingham Forest midfielder Morgan Gibbs-White chuan Tottenham Hotspur a zawm dawn emaw tih hnuah thuthar a awm a, Forest chuan an phalna loa Spurs-in an player an lo biak avangin hmalak dan tur an ngaihtuah.

England international hian a contract-ah pound maktaduai 60-a chhuah theihna dan a ziak tel a, hei hi Spurs chuan chhawr ṭangkaia London lama thlem luh an tum.

Khawthlang media-te chuan Gibbs-White hian nimin khan medical a nei dawn niin an sawi a, mahse, Forest ber hian an phalna tel loin London club hian an player hi an bia niin an sawi a, dan anga hmalak an tum ta a ni.

Spurs hian Gibbs-White-a man zatah hian £60mtd hi an phal vek tawh a, mahse, Forest lamin thuthar an neih leh takah chuan transfer hi thleng lo thei dinhmunah a ding - Premier League danah club phalna loin player lo dawr ngawt theih a ni lo.

Manchester City pawhin Gibbs-White hi an thlithlai hman a, mahse, na takin an bawhzui lem lo thung.

England tana vawi li inlan tawh Gibbs-White hian Wolverhampton Wanderers aṭanga a professional zinkawng zawh ṭanin, Swansea City leh Sheffield United-ah te loan-in a khel tawh bawk.

August 2022 khan Forest hi Wolverhampton Wanderers aṭangin £25mtd (+add-ons) in a zawm a, an club player man to ber niiin, kum nga chhung atan contract a ziak. Forest-ah kum thum a khelh chhungin match 118-ah a inlan a, goal 18 khungin, assist vawi 28 a nei.

Season hman zawh takah khan league match 34 khelin goal sarih a khung a, assist vawi riat a nei tel - Europe-a Nottingham an kir theihna turin a thawhhlawk hle.

Spurs hian Forest hmalakna hi hre mah se, Gibbs-White lakluh theih erawh an la inbeisei reng nia sawi a ni a, Forest hian an player pawimawh Anthony Elanga chu Newcastle United hnenah £55mtd-in an lo hralh tawh.