Spurs-ah Kudus a chiang ta

Tottenham Hotspur chuan West Ham aṭangin Mohammed Kudus an la lut fel ta a, a man atan pound maktaduai 55 an inseng - kum ruk atan contract a ziak a, London club-ah hian kum 2031 thleng a khel dawn tihna a ni.

Kum 24 mi Kudus chuan, "Level sang thei ang bera khelh hi ka duh ṭhin. Spurs hi club lian tak an ni a, Champions League an khel dawn bawk. Hei vang hian he club ka zawm thei hi ka lawm a, bul ṭan ka châk tawh hle," a ti.

Ghana midfielder Kudus hian August 2023 khan Ajax aṭangin Hammers hi £35.6mtd-in a zawm a, a khelh ṭhat dan a zira £2.5mtd pek belh tur a ni. Hammers tan inelna hrang hrangah match 80 khelin goal 19 a khung a, assist 13 a nei bawk.

Spurs hian kar hmasa khan Kudus hi £50mtd-a lakluh an lo tum tawh a, mahse, West Ham hian lo hnarin, £50mtd-in an inrem thei ta a ni.

Kudus hi EPL club langsar dang pawhin an ngaihven nia sawi a ni a, mahse, amah ber hian London Hmar Veng club zawm hi a duh.

Hammers-a a season hmasa bera goal 14 leh assist vawi kua neitu Kudus chuan coach thar Thomas Frank chu Spurs a zawm chhan langsar niin a sawi a, Ghana international chuan, "Frank-a sulhnu ka thlir a, a hnuaia player-ten hma an sawn dan ka hmuhin ani nena thawhdun hi ka châk a ni," a ti.

Europa League champion Spurs hian Brentford forward Yoane Wissa an rim mek bawk a, Nottingham Forest midfielder Morgan Gibbs-White an la lut dawn bawk.