Serie A training an ṭan dawn ta

Serie A hian an inbeisei dan chuan May 27 leh June 2 inkarah season khelh chhunzawm leh theih an inring a, August thlatir lamah season khar theih an beisei. 

Mahse, Italian top flight football hian official takin season an ṭan leh theih hun tur erawh an puangzar lo a, May 4-a training ṭan turah hian team anga training neikhawm kha phal a ni dawn lo. 

Italy prime minister Giuseppe Conte chuan Serie A training neih an phal tawh thu hi television kaltlangin a puang a, mahse player-te chu a mal ṭheuha training nei turin a hriattir thung. 

Conte chuan, "May 4 aṭangin mimalin training an nei ṭan ang a, May 18-ah team training an kalpui ṭan thei ang. Chumi zawhah chuan season khelh zawh theih a nih dawn leh dawn loh kan la thlir leh dawn a ni," a ti.

 

Italian Prime Minister hian an vaia an him tlanna tur ngaihtuah chunga engkim uluk taka kalpui a nih tur thu a sawi tel a, "Infiamna kan ngaina tlang em em a, kan infiammite hi an kulcho mai kan phal bik lo a ni," tiin a sawi. 

Coronavirus hrileng tuar na ber pawl Italy hian May 4 aṭangin lockdown an neih chu an thlahdul dawn. Mahse, midang hlat zawng metre khat tal a ni tur a ni tih chu chhunzawm zel tur a ni a, insawizawi laiin metre hnih a nih a ngai thung. 

Italian Football Federation (FIGC) chuan May thlatirah player-te Covid-19 an kai leh kai loh en turin test neih vek an tum a, ruahmanna thui tak kalpui a ni tawh. 

Training ṭan hunah hian club tin hian group-ah player, technical staff, doctor leh physiotherapist an ṭhen hrang ang a, test a nei ang a, nipui lai training camp anga duanah khunghran an ni ang. 

Serie A hi March 9 khan tihtawp a ni a, player engemawzatin Covid-19 an kai tih hmuh a ni bawk. Mahse, Italian top flight football hian khelh zawh hram an tum thu an sawi reng a, an tum ang ngeiin an khel zo thei dawn niin a lang. 

Italian top flight football hi season dang ang chu ni se June 30-ah an zo fel ang - mahse an chawlh rei tawh miau avangin FIGC chuan kar hmasa Ningani khan August 2-a zawh an tum thu an sawi.

Serie A-ah hian round 12 khelh tur a la awm a, Juventus chu anmahni hnaih bertu Lazio aia point khata sangin table chung berah an awm mek. Serie A khelh chhunzawm duh lo hi an awm ve nual tho a, chung zingah chuan Brescia president Massimo Cellino chu a langsar pawl a ni - hriat tel tur erawh Brescia hi table mawngphahah an awm mek. 

Italy hi tarlan tawh angin Covid-19 tuar na ber pawl an ni a, mahse Pathianni khan March 14 hnua ni khata thi an neih tlem ber ṭum tawngin mi 260 an thi a, ziaawm lam an pan ve zel.

Johns Hopkins University-in an tarlan dan chuan Italy hian Covid-19 kai mi 197,675 an nei a, mi 26,644-in an thihpui tawh - hetiang taka tuar na ramin Serie A training neih an phal leh ṭan tawh a, Europe ram dangten uluk takin an thlir zui ang. 

UK sorkar pawhin an ram chhunga infiamna chawl ṭhuapte a rang lama neih chhunzawm leh dan an ngaihtuah dawn a, tun kar chhung hian infiamna langsar zuala senior medical director-te titi puina an nei dawn a ni.