Nipui bazarah sum che vel a tlem dawn?

European football expert Kristof Terreur chuan, "Free transfer a thleng nasa ang tih ka ring a, club ṭhenkhat chuan a free-a an lakluh theih tur player-te an dawr ṭan der tawh a ni," a ti. 

Coronavirus vangin European club hausa ten sum an chan nasa - TV rights aṭanga an sum hmuh tur a chawl ṭhuap a, match ticket aṭanga sum hmuh tur a awm lo a, club bungrua zawrhna kalpui theih a ni lo bawk. 

Spanish football expert Guillem Balague chuan, "Real Madrid-in Paul Pogba leh Neymar an lei dawn tih sawi thawm a awm a, mahse theihnghilh hmak rawh u. Transfer liantham a thleng dawn lo," a ti!

Thomas Meunier chuan season tawp rualin Paris St-Germain-a a contract neihlai a hmang zo tawh dawn a, Belgian right back hi Tottenham Hotspur chuan lakluh theih inbeiseiin an be der tawh. 

Terreur chuan, "Tottenham manager Mourinho chuan Meunier hi phone hmangin a be der tawh. Amah anga contract hmang zo tur player-te hi an luck dawn a, Belgium tana a khelhpui Jan Vertonghen pawh a chhuah ka ring," a ti. 

Kum 33 mi Vertonghen hian kum 2012 khan Ajax aṭangin Spurs hi a zawm a, nipuiah a contract a hmang zo tawh dawn. Belgium international hian tun hnaiah a contract zawh tur thu a sawi lang zauh a, chhuah a duh tihna a ni. 

Terreur chuan, "Vertonghen hian ṭawng thar zir a, boruak thar tem a duh a, Italy emaw Spain lamah a kal ka ring. Contract hmang zo mai tur player-te hian betu an ngah hle a ni," a ti. 

Covid-19 in club lian leh te a thliar lo a, he hri leng hlauhawm tuartu zingah hian Real Madrid leh Barcelona pawh an tel - transfer apianga sum seng hnem ṭhin club lian pahnih hian tun transfer-ah chuan sum sen tur an nei bik kher lo ang. 

Barcelona hi Inter Milan striker ṭhangduang Lautaro Martinez nen sawizawm an ni a, mahse Argentine striker hi a contract-ah pound maktaduai 97-a leichhuah theih a nih thu a inziak. 

Catalan club tan Covid-19 hri len hnua heti zat sum sen hi atthlak a ni dawn - mahse Balague chuan Barca hian player hi an inrempui tawh niin an sawi. Balague chuan, "Barca hian Martinez hi inremna an neihpui tawh. Mahse, engtinnge Inter Milan hi an hmin ang tih chu zawhna a ni. 

"Inter hian an duh ang player an nei let thei a nih chuan Martinez kaltir hi an pawiti lo ang. Ivan Rakitic, Arthur, Nelson Semedo leh Samuel Umtiti-te hi ui hauh loa Barca-in an pek theih tur chu an ni," a ti - mahse Barca hian Martinez leina tur sum hi an nei ang em? Lo nei ta se, an player kaltirte thlakna tur leina tur an nei ang em? Zawhna tam tak a awm. 

Real Madrid chhungkaw hrechiangtu Balague-a thusawi hi awih tur a nih chuan Juventus-in player hlawh hnem Cristiano Ronaldo chhuahtir an phal a, Real Madrid an dawr. Mahse, Real hian, "Kan player mamawh a ni lo," tiin an lo chhang niin a sawi. 

Tun hnaiah Ronaldo hi Juventus lama kir tura sawi thawm a ri ring hle a, mahse Balague chuan, "Ronaldo hi Manchester United emaw Real Madrid-a kir tur anga sawi a awm a, mahse hei hi thawnthu phuahchawp mai a ni," a ti. 

Thu lengvak pakhatah chuan Covid-19 vangin Juventus sum lakluh nasa takin a tlahniam a, hlawh hnem fal Ronaldo hian an buaina a hriatthiam theih nan 'a tel lo pawhin an awm thei' tih hi tihlan an duh. 

Juventus hian an player-te hlawh chu thla li chhung atan la rih lo turin inremna an neihpui tawh a, Italian club pawh hi transfer bazar-ah an che na viau thei lo. 

Spanish club lian Real Madrid hian season hmasa ṭan dawn khan pound maktaduai 300 bawr vel player lei nan an seng a, Covid 19 vangin Barca nen hian pound maktaduai 100 chuang hloh theih dinhmunah an ding mek bawk. 

Hetiang boruak karah hian transfer boruak ti 'hot' ṭhin Real Madrid hian man to taka player leina tur an nei lo ang tih a chiang a, Balague chuan Real rilru senna tur chu loan-a an chhuahtir player koh kir a nih thu a sawi. 

Balague chuan, "Madrid hian loan-a an chhuahtir player-te koh kir lamah rilru an seng ang tih a rinawm a, Martin Odegaard emaw Achraf Hakimi hi chu an koh kir ngei ka ring," a ti. 

Kum 21 mi Odegaard hian Real Sociedad-ah season duhawm tak a hmang mek a, Norwegian midfielder hian tun season inelna hrang hrangah match 28 khelin goal sarih a khung tawh a, assist vawi riat a nei bawk. Kum 21 mi Hakimi hi Borussia Dortmund-ah loan-in a khel mek a, tun season inelna hrang hrangah match 37 khelin goal sarih a khung a, assist vawi 10 a nei thei. 

English club zinga transfer-a sum chelek nasa ber pawl chu Manchester United an ni - mahse United hian tun nipui transfer-ah chuan sum hman tur an nei vak dawn lo a, he thu hi club executive vice-chairman Ed Woodward ngeiin chiang takin a sawi. 

Red Devils hi pound maktaduai 200-a Tottenham striker Harry Kane lalut tur leh English rawlthar ṭhangduang Jadon Sancho lalut tura sawi an ni a, Dortmund tana khel mek Sancho hi pound maktaduai 130 man vel a ni. 

Mahse, United fan-ten duhthu an sam laiin Woodward chuan thil nihna dik tak a sawi a, "Eng club tan pawh, keimahni ngei pawh tiamin, season dang angin transfer bazar-ah chet theih a ni dawn lo," a ti. 

Woodward-a'n chiang takin a sawi tawh a, United pawh hian an tih theih tur chu free transfer-a lakluh tur leh loan-a khelhtirte koh kir a ni maiin a lang - engemaw hawi zawng takin transfer bazar hi a ngaihnawm dawn.