Football hre loin AIFF an kaihruai - Bhaichung

Tun hnaia Indian football buaina chungchanga ṭawng tam leh AIFF bei nasa bera chhal ngam chu Bhaichung Bhutia a ni a, Indian football legend hi Vanglaini chuan a be pawp zui a, a insum lo.

Bhaichung chuan, "Kan kalphung buaina hi tuna inṭan chauh a ni lo a, buaina a rei tawh. FIFA-in kum 2022-ah AIFF a ban lailawk a, a hnuah hma lak a ni a, FIFA U-17 Women's World Cup 2022 kan thlen dawn bawk si avangin kan hremna pawh hlih a ni.

"Khami zawh rual khan kan pawm tlan tur constitution ṭha tak awm ni se, tun hi kan thleng lo ang. Mahse, engmah an ti lo a, kalphung mumal loin kan kal a, Supreme Court a inrawlh ngei ngei a ngai a, tun hun hi kan thlen phah," tiin Vanglaini a hrilh.

Indian football legend Bhaichung chuan tuna AIFF hruaitute bei zuiin, "AIFF hruaitu zingah football kalphung, a nih dan, a kal dan, thil engmah hrethiam an awm lo a, FSDL-in season thar ISL atana an duhdan an thlen a, anni lamin thlen ve tur pawh an nei lo - football hi an hrethiam lo a ni," a ti!

Bhaichung chuan Indian football buaina chingfel tur erawhin hun a ngaih thu a sawi a, hmanhmawh loh a ṭul thu Vanglaini a hrilh. Sikkimese Sniper chuan, "Hmanhmawh chuk pawh a fuh chuang lo a, a pawimawh ber chu Indian football tana ṭha ber tura kan ngaihtuah tlan hi a ni.

"ISL an ṭan khan ka chawl a, ka chawlhsan khan top 100 kan ni a, tunah chuan 133-ah kan awm. Thil dik lo a awm a, chu thil dik lo chu kan chinfel phawt loh chuan engmah a kal dik tak tak thei lo ang," a ti a, Indian football-in hmasawn zawng ni lo, a hnungtawlh zawnga ke a pen thu Vanglaini a hrilh.

Bhaichung chuan AIFF president Kalyan Chaubey sawisel zuiin, "Kan President hian eng hna mah a thawk tak tak lo. Indian football engmah a hre lo a, 'North East player-te hi thiam viau mah se, international level atan an san lam hi a fuh tawk lo. Chuvangin Rajasthan ang aṭanga player chawk luh a, player sang ṭha kan chher a ngai,' tih a sawite khan Indian football a hriat lohzia a pholang.

"A tirah Asian Cup 2027 thlen kan tum a, kan inhnukdawk a, Asian Cup 2031 zawk, tiin dilna kan thehlut leh a, engmah hi a mumal lo. Constitution thar awm se, hruaitu thar awm se, hma kan sawn mai ang," a ti a, AIFF hruaitute a duhkhawp lo hle.

Bhaichung chuan AIFF President nih tumna erawh a neih tawh loh thu Vanglaini hrilhin, "President nih lam ka ngaihtuah lo a, mahse, Indian football hmasawn nana ke pen thei an awm chuan thlawp turin ka inpeih a ni," a ti a, Indian football tana ṭha ber tur chu a ngaihtuah a nih thu a sawi.