Hruaitu thar kan mamawh - Dr. Shaji

AIFF secretary general hlui, president Kalyan Chaubey nen an inhmuh thiam loh avanga ban ni ta Dr. Shaji Prabhakaran chuan, "Kan dinhmun hi a chhe em em a, Indian football hi a thawh leh theih hram ka beisei," tiin Vanglaini a hrilh.

FIFA South Central Asia development officer hlui Shaji chuan, "Kan inrelbawlna kan siam ṭhat a, hruaitu thar kan thlan a ngai. Chumi zawhah Indian football tana tha thawhtute zawng zawng inrawn khawm a, kan kal zel dan tur sawi a ngai a ni," a ti.

Shaji chuan tun hun leh nakin hun thlir thiam tak chunga ruahmanna siam a ṭul thu Vanglaini hrilhin, 'Back to the Roots: A Definitive Guide to Grassroots & Football Development' tih lehkhabu ziaktu chuan, "Tuna kan tih theih kan thlir a ngai a, chumi tihlawhtling tur chuan mithiam kan rawih a ṭul bawk.

"National team-a level hrang hrangah coach ṭha tak rawih an ngai bawk," a ti a, Indian football dinhmun ṭha lo tak khai chhuak turin tih tur tam tak a awm thu a sawi.