Hruaitu engmah hre lo an tam - Joe Morrison

Indian football hrechiangtu, BBC sports reporter leh commentator hlui Joe Morrison chuan, "Indian football-ah chuan hruaitu, engmah hre lo, ni awm ang taka awm ve an tam em a ni," tiin Vanglaini a hrilh!

Newcastle United, TEN Sports, TEN Action+, SONY SIX leh SSC-ah te thawk ṭhin Morrison chuan, "Indian football thlir ila, football kalphung man miah lo hruaitu an tam em em. Coach ni se, league level sang emaw international level-a team la kaihruai ngai lote an ni hlawm.

"Players zingah lah pressure zo an tlem em em bawk," a ti a, Indian football-in hma a sawn lehna tur chuan siamṭhat ngai tam tak a awm thu Vanglaini a hrilh.

Middle east leh Singapore-a Premier League tihlarna kawnga thawhhlawk tak Morrison chuan player hlawh tam chungchang pawh sawi langin, "Hlawh tam hi player thiam loh a ni lo a, hlawha mawhphurtu chu club-te an ni," a ti.

Morrison chuan sawi zawmin, "A bik taka Indian football team-in hma an sawn lehna tur chuan, naupan tet aṭanga inzirtir a ngai a, an rilruah football tuh a ngai," a ti a, a ler aṭanga ṭhuaiin awmzia a neih loh thu a sawi.

Joe Morrison hian Indian football tana a ngaihdan tlang tak takin social media lamah a tarlang ṭhin a, X (twitter)-ah joefooty tiin a awm.