MBBA Inter Veng 2025: Tuikual South leh Nursery ten semifinal an lut

LESDE MBBA Inter Veng Basketball Tournament quarterfinal-ah Tuikual South leh Nursery ten an khingpui Chawnpui leh Tuikual North te hnehin semifinal an lut. July 16, Nilaini zan hian Tuikual South leh Nursery ten final khel tur an zawng dawn. Nizan khan quarterfinal match hnih khelh a ni a, result kan hre hman lo.

Basketball veng/khua inelna hi R. Dengṭhuama Stadium-ah khelh a ni a, quarterfinal khelh a ni tawh nachungin ṭhutna a la thawl rih hle. Inelna buatsaihtu MBBA, basketball hmangaihtute leh team la damte tan ṭan a ṭul takzet.

Dina telna TKS

Tuikual South-in Chawnpui lakah bul an ṭan ṭha a, hma pawh an hruai deuh char char. Tawnhriat nei ṭha F. Zodinthara'n Tuikual South hi a ho a, pressure sangah tawnhriat nei player an hlu.

Chutihrualin Chawnpui lamin tlawm mai an tum lo a, third quarter-ah 55-46 ni mah se fourth quarter tawp lamah point khat chauhin an pha tawh lo. Eng team zawk pawh chak thei dinhmunah an ding a, Tuikual South-in free throw hmang ṭangkaiin hun a tawp meuh chuan 73 - 65 in hnehna an chang.

Nursery an puitling

Semifinal-a Tuikual Derby thleng turin Tuikual North-in Nursery an hneh a ṭul a, rinkai lo zawk ni mah se palian Michael Liansanga te an kawl avangin bul pawh an ṭan ṭha. Point 15 ten Tuikual North hi fal hman mah se halftime-ah 39-36 niin point thum chauhin hma an hruai tawh.

Inkhel boruak a sang chho a, team pahnih an intluk tawk cho zel. Fourth quarter-ah pawh Tuikual North-in hma an hruai zel a, mah se Nursery hi Inter Veng Under 23 champion thei an ni a, champion puitu Emmanuel VL Awmpuia leh a ṭhiante an puitling. Hun tawp lamah Nursery hi rawn tho chhuakin 82-76 in an chak ta zawk a, Tuikual North erawhin hun tawp lama an fimkhur loh an tuar thung.