Silly Point : London Bridge is not falling down

Ṭum nga intawng tur Test Series rei tak hian taksa mai ni lo, rilru leh thlarau zawng zawng hi a nghawng thei a. Test cricket tih sakhming an lo phuah pawh hi a inhmeh ngawih ngawih. Sap ho kulhpui nghet Edgbaston chu Bharat Army-ten luhchhuah mah se, London kulhpui erawh a la him hrih a, London Bridge a la 'fall down' lo e.

Test Cricket a nung

Ni nga awh inkhel, session 15 a ṭhendarh hi, a tawp ni (a ni nga ni) session tawp ber thlenga chak zawk tur la chiangthei lo khawpa inkhel inhnehtawk tak a nih tawh hi chuan, a hmuhnawm lo theih loh tih a chiang. Cricket Mecca hmunah Test match meichher a alh nawn leh a, cricket ropuina phochhuahin a awm a ni.

India - harh teh

3-0 a nuamsa taka series hmahruai a, chak thei tawh tur Shubman Gill leh a hote , tun fourth Test an khelh leh hma ni riat chawlh an neih chhung hian, an han dawnletin an han chhuikir ve ngei ang a, an ui telh telh dawn tih a hriat.

Tun Lord's inkhel hmuhnawm takah pawh khan, thil ropui tak tih a ngai lem lo a, thil ṭul lo an tih tam luat avanga chak lo an ni tih hi ka thuthlukna a ni.

Khandaih hriamtawn

Khandaih hriamtawn hi hmanthiam chuan hmelma pahinih a ruala fik theihna a nih rualin, hman thiam loh erawh chuan mahni leh mahni intipalh theihna a ni lawi si a. India tan vice captain Rishabh Pant leh Jasprit Bumrah te hi khandaih hriam tawn a ni ta ber mai em aw ka ti.

Mimal pawn team chakpui thei khawpa mi bik player pahnihte hi (an lo chakpui fo tawh) tun ṭum Lord's test ah erawh India mu tanna an ni in ka hria? Ni lina chho aṭangin Lord's pitch kha ball sawt a mumal dawn lo a, batting a har chho dawn tih kha hriat sa a ni.

Chumi avang tak chuan vaw hnuhnung zawk India khan 1st innings a khan run 80-100 vel tala hma an hruai kha a pawimawh ngawih ngawih a. Batting nawm lai bera ball vaw chho tur senior player Rishabh Pant-a'n ni hnihna session tawp bera KL Rahul a century vuak chhuahtir a tum luata run ṭul lo lutuk a lakluihpui avanga run out kha tun inkhela boruak tidanglamtu a ni.

Test match-ah run out khut khut hi chu sual ngaihdam theih loh tluka ka dah a ni. 1st innings score inzat chiah chiah a nih tawh kha chuan, a tum lina leh ni ngana chhoha bat leh tur Team India kha a hnufual zawk tur an ni sa tawh hrim hrim tih kha thil chiang reng a ni.

Jasprit Bumrah erawh a khelh apiangin wicket a la ṭeuh ṭeuh a, mahse team an la chak loh ziah thung. Hei hian Jasprit Bumrah hi khawvela bowler ṭha ber ni mahse, India team nen hian an chek a in mil lo emawni chu aw ka tia ka hlauhthawnna hi a awmna rei tawh. World Cup 2023 aṭanga, nikum Australia an tlawh aṭang khan he thil hi a thleng fo ta mai.

Captain inanglo

Tun series a run 600 vaw chhuak tawh Shubman Gill erawh, a inzirzel nan damdawi kha a lem zeuh zeuh a ngai ta fo a. Mihring mihrinna mi ti zawk zawk lo leh cool deuh si, a u Virat Kohli anga invaivung a, khelmual chhunga tumpuite han chaltauh deuh rap rapa khel ṭha chi a ni ve chiah lo niin ka hria.

MS Dhoni te anga dam taka inkhel thunun tur chi zawk zia a ni a. Tun Lord's inkhelah khan a batting a nghawng tlatlin ka hria. England captain Ben Stokes erawh all-rounder ṭha mi a nihna pholangin, hmahruaituah a ṭang.

Stokes hian century hlu tak hlap chhuak lo mah se, 30-40 runs hlu tak, wicket pawimawh 3-4 la zat zat reng, run out pawimawh hlawhchhuak bawk. A ṭul chuan bowler ho zingah pawh hah sawi lo a, over vawm hnem ber a ni leh mai a. Man of the Match nih pawh a phu narawh e.

Manchester lamtluang

Kar khat chuang chawlh lailawk an hman hnuah, kar thar lamah Old Trafford, Manchester lamah a ṭum li nan an inkhuainuai leh ang a. Chumi zawhah The Oval , London-ah a tawp an khar dawn.

India team erawh phengphe khua a tlai hma hian an ṭhangharh a ngai takzet. London Bridge erawh a la 'falling down' lo zel e.