Kuminah Aizawl Tlang Ruam lian zawka neih a ni dawn - Sports Minister

Red Bull Aizawl Tlang Ruam chu kumin kumtawp hian Red Bull, Sports & Youth Services leh Tourism Department ten buatsaih leh dawn a, nimin khan minister Lalnghinglova Hmar hoin sorkar department aiawh leh khawtlang hruaitute an ṭhukhawm.

Lalnghinglova Hmar chuan, "Aizawl Tlang Ruam chu kuminah lian zawk leh huamzau zawk, intihsiakna kalkawng pawh harsa (challenging) leh thui zawk a buatsaih tum a ni.

"Tlang Ruam chu India leh khawvel hriatah a ṭha zawnga Mizoram phochhuahna remchang leh pawimawh tak a ni a, sports intihsiakna a nih piahlamah mipui tan intihhlimna, mi tamtak tan eizawnna siamtu leh tourism-a hmasawnna thlen theitu ni bawk a nih avangin, lian leh ropui zawka ti tur chuan theihtawp chhuaha ṭanrual a ṭul a ni," tiin a sawi.

‘Aizawl Tlang Ruam 2025’ hi kumin November thlaah neih tura ruahman a ni a; Upper Republic aṭanga Republic Veng leh Republic Vengthlang paltlangin ITI kawn thleng tlan tura ruahman chhin a ni a. Intlansiakna kawng (route) piahlamah media coverage leh inbuatsaihna dang te pawh international standard vek a kalpui tum a ni. Event pumpui hi Jio TV kaltlanga live a pekchhuah tum a ni bawk.

Khawpui chhunga mountain bike intlansiak, ‘Red Bull Aizawl Tlang Ruam’ hi nikum October 26 khan a vawi khatnan hlawhtling taka buatsaih a lo ni tawh a, Asia khawmualpuia Red Bull buatsaih Urban downhill mountain bike intlansiak hmasa ber a ni nghe nghe. Nikumah khan mi 22 intihsiakin, cycling khawvela mi langsar pahnih – Tomas Slavik (Czech Republic) leh Pedro Burns (Chile) te chu mentor angin an tel a ni.