AC Milan-ah Modric a lut ta

Real Madrid captain leh club legend ni bawk Luka Modric chuan Santiago Bernabeu-ah kum 13 zet hun a hman hnuin khawdang a hawi ve ta a, kum 39 mi ni tawh mah se, European top flight league a la khelh chhunzawm dawn zui - AC Milan a zawm.

Modric hian Milan-ah hian season khat atan contract a ziak phawt a, June 2026 thleng a khel ang. Hetihlai hian kum khat dang pawhsei theihna dan a awm tel bawk a, kum 40 chuang a nih thlengin European top five league-ah a la khel dawn tihna a ni - a nep lo hle.

Croatian midfielder Modric hian May thla khan Real Madrid a chhuahsan tur thu a puang a, FIFA Club World Cup-te khel leh phawtin, CWC aṭanga an tlak fel hnuah Serie A club hi a zawm ta a ni.

Modric chuan, "Ka hringnuna zinkawng thar ka zawh thei tur hi ka lawm hle a ni," a ti a, Milan coach Massimiliano Allegri chuan, "Player ṭha bik chungchuang," tiin Modric chungchang hi a lo sawi tawh bawk.

Croatian club lar Dinamo Zagreb aṭanga a professional zinkawng zawh ṭantu Modric hian kum 2012 khan Tottenham Hotspur aṭangin Real hi a zawm a, a hun lai hian pound maktaduai 16.5 man a ni.

Real tan match 597 khelin goal 43 a khung a, assist vawi 95 a nei. Spanish club tan nomawi 28 ngawt chawiin, heng zingah hian Champions League nomawi paruk leh La Liga title pali a tel a, Real tana champion nomawi chawi hnem ber record a tling.

Kum 2018-a Ballon d'Or dawngtu Modric hian sum tam tak hlawh tura Major League Soccer leh Saudi Pro League lam sawmna pawh a hnar nia sawi a ni a, Italian club-ah hian season khatah euro maktaduai 3.5 a hlawh ang a, a khelh ṭhat dan a zir leh club chet ṭhat dan a zirin bonus a awm dawn bawk.

Modric hian World Cup 2026 khelh a la tum nia sawi a ni a, USA, Mexico leh Canada ten an inthlen ṭawm tur inelnaa inlan turin, a level sang thei anga la inlan zel a duh niin a lang.

AC Milan hian manager thar Massimiliano Allegri kaihhruaina hnuaiah season thar an hmachhawn dawn. Juventus boss hlui hian 2010-14 inkar kha AC Milan hi a lo enkawl tawh a, kum 2011 khan Serie A nomawi a chawipui.

Juventus a enkawl laiin Italian top flight league-ah hian vawi nga a champion bawk a, Juve a enkawl vawi hnihnaah erawh Coppa Italia chiah a champion pui - Milan-ah hlawhtlin a tum dawn a, Serie A an champion chuan Modric-a ropuina belhchhahin a awm ang.