Wimbledon champion Sinner lawmpuitu Alcaraz

Carlos Alcaraz chuan Pathianni zan khan Wimbledon final-ah 4-6, 6-4, 6-4, 6-4 in seeded number 1 Jannik Sinner a hneh lo a, thiam takin a lawmpui. Kum 22 mi Alacaraz hi tun hnai kum hnih chhung a zawna champion thei ni mah se Wimbledon final-ah a vanduai zawkah a ṭang.

Spanish star Alcaraz hi kum 22 mi a ni a, mahse a puitling tawh hle. A hneh loh a lawmpui thiam bakah amah ṭantute a hnenah lawmthu a sawi let nghal thei a, inkhel entute hmaah hmuh hrehawm leh mawi lo in a awm lo.

Grand Slam vawi nga champion tawh Alcaraz chuan, "Hlim takin kan inkhelhna hmun ka chhuahsan, a chak lo zawk ni mah ila final thleng ṭha tawk takin ka khel thei a, lawmna tur a ni. Grand Slam final-a ka chak lohna aiin final ka khel a ni tih hriat reng ak duh zawk.

"Chak lo nih vanga lawm tur tihna erawh a ni kher lo a, lungngaia indawm kun reng tur tihna pawh a ni chuang lo. Ka dinhmunah erawh ka vui lo a, champion Sinner ka lawmpui em em a ni," tiin a elpui a lawmpui thu a sawi.

Kum 22 mi chauh ni chungin Alcaraz hian Grand Slam title panga ngawt a nei der tawh a, hliam leh harsatna dangin a tlakbuak a nih ngawt loh chuan a la champion belh ngei a rinawm. Clay, hard leh grass-ah te a hlawhtling vek tawh, atan hmabak a êng hle.

Paris Olympic 2024 final-ah khan Alcaraz hian Novak Djokovic a ngam lo. Grand Slam vawi 24 champion tawh Novak aṭangin thil tam tak a zir tih sawiin Alcaraz chuan, "Olympic final kan khelh zawh chiah kha chuan ka rilru a hnualin hrehawm ka ti takzet.

"Season hmasa khan Grand Slam title pahnih chu ka la ngei mai, mahse Spain tana Olympic gold medal ka la thei lo khan min ti hrehawm. Ka chak lohna aṭang khan thil tam tak ka zir chhuak a, tunah chuan dinhmun ṭha lo zawk nih pawh ka thiam tawh," a ti.

Sinner chungchang sawi zuiin Alcaraz chuan, "Match kan khelh chiah kha a harsa dawn tih ka hre nghal, kan intawn hmasaka a chak lohna aṭangin a inzir tih pawh ka hrethiam nghal bawk. Point khat lek hmuh belh pawh kha a harsa thei hle.

"A nihna takah chuan kan khingpui te an khel ṭha lutuk a nih chuan rilru tih paukhauh reng pawh a harsat chang a awm. Engtiangin nge ka beih let ang tih ka ngaihtuah chhungin thil ṭha dang a rawn ti chhuak leh hman ṭhin," tiin Sinner chuan champion phu khawpin a khel tih a sawi.