Newcastle-in Ekitike an dawr

Premier League club Newcastle United chuan Eintracht Frankfurt striker Hugo Ekitike an thlithlai mek a, pound maktaduai 70 chuang tal sen a ngaih dawn avangin St James' Park-ah an la lut thei a nih chuan an club player man to ber a ni ang.

Ekitike hian season hman zawh takah khan Eintracht Frankfurt tan inelna hrang hrangah match 48 khelin goal 22 a khung a, assist vawi 12 a nei - Bundesliga bikah goal 15 khungin, assist vawi riat a nei a, a club hi pathumna a nihpui.

Newcastle hian Ekitike lakluh an tum avangin an striker Alexander Isak hralh mai tura ngaihna awm mah se, Magpies hian Liverpool hel lai an player hi chhuahtir an tum lo.

Kum 25 mi Isak hian kum 2022 khan Real Sociedad aṭangin Magpies hi £63mtd-in a zawm a, club player man to ber a ni mek - season hman zawh takah khan English club tan match 42-ah goal 27 ngawt khungin, assist vawi ruk a nei.

Hei vang hian Liverpool bakah European club langsar tak takin Isak hi an ngaihven a, mahse, Magpies hian hralh ai chuan Ekitike lakluh belh a, team ṭha tak din an tum zawk - season tharah Champions League an khel dawn.

Ekitike hi 6ft 3in-a sang niin, French club Reimas aṭangin a professional zinkawng a zawh ṭan a, Eintracht Frankfurt hi February 2024 khan Paris Saint-Germain aṭangin loan-in a zawm a, season tawpah a nghetin an la lut.

Season khat chauh German club tan a nghetin a la khel hman tihna a ni a, Magpies hian an la lut thei a, Isak an chelh thei a nih bawk chuan tlarhma lamah chuan an ngaihtuahawm lo khawp ang.

Newcastle hian kar hmasa lawk khan Nottingham Forest aṭangin Anthony Elanga chu pound maktaduai 55-in an la lut tawh bawk a, chet nat chhunzawm zel an la tum niin a lang.