An hmingah 'SinCaraz' an ti...!

Roger Federer leh Rafael Nadal inelna kha tennis khawvelah chuan mi pahnih inelna lian leh hriat hlawh bera chhal ngam a ni a, chumi hnuah Novak Djokovic leh Federer leh Nadal te hi inelna lian leh hautak a neihpui leh bawk.

Tunah Jannik Sinner leh Carlos Alcaraz te hun a rawn inherchhuak a, player ṭha pahnih hian Grand Slam nomawi lak theih hnuhnung pasarih chu an insem vek; khawthlang chanchinbu te chuan anni pahnih inelna hi 'SinCaraz' tiin an hming an phuahsak a ni.

Alcaraz hi a kum naupang zawk mah se Grand Slam champion tam zawk a ni a, vawi nga champion tawhin ṭum khatin a champion tam zawk. Court hrang hrangah a champion thei vek tih a takin a fiah tawh bawk.

Grass court bikah chuan match a khelh hnuhnung 38 zinga 35 tehmeuhah hnehna a chang thei. A kum zawna Wimbledon champion thei a nihna khan a ṭhat tawkzai a lantir a, tunah a vanduai zawk ni mah se atan grass court hi hmun ṭha a nihzia chu a fiah tawh.

Alcaraz ṭhatzia sawi nep theih a ni lo a, chutihrualin a elpui Sinner hi ranking sang zawk a nih miau avangin Italian tlangval nep lo zia ti fiahtu a ni tel nghal bawk, tunah chuan hard court bakah grass-ah pawh a champion thei tih kan hmu ta bawk.

Tun hnaiah Sinner hian Alcaraz a hneh khat hle, tun ṭum final an khelh turah pawh khan a chak loh ringtu an tam zawk hialin a rinawm. Mahse, inkhel boruak sangah a chiai lo a, a sulhnu ṭha lo lak aṭanga talchhuah tuma a beih dan chuan fak a hlawh hle.

Tennis inelna huangah chuan service a pawimawh, a bik takin grass-ah chuan ball vuak na a hlu zual ṭhin. Tun ṭumah pawh khan Sinner hian a service ṭha chu a dinchanpui a ni pakhat a, mahni service hum theih hian kawngro a su thui hle ṭhin a ni.

Sinner leh Alcaraz te hi kum 23 leh kum 22 mi an ni a, an inthlau lo hle - hma hun eng leh thui tak an nei. Federer leh Nadal inelna boruak ang nei thei turin theihna an nei a, chutihrualin player ropui bikte sulhnu chhui tur erawhin hlen chhuah tur an la ngah hle thung.

Season hmasa khan Grand Slam pali an insem vek a, kuminah pathum an khelh tawh chu an insem bawk - tun season atana hnuhnung ber turin US Open an la khel leh dawn; New York khawpuia inelna an neih hmain inbuatsaihna tournament tenau zawk hrang hrang an khel leh rih ang.