Real Madrid-in Carreras an la lut

Xabi Alonso hoa indinthar tum mek Real Madrid pawh nipui transfer lamah an chet nat chhunzawm zel a, Spanish defender Alvaro Carreras chu Benfica aṭangin pound maktaduai 43-in an la lut.

Kum 22 mi left back hian Santiago Bernabeu-ah hian kum ruk chhung atan contract a ziak a, Real hian right back leh left back thar an nei tihna a ni - Liverpool aṭangin right back Trent Alexander-Arnold chu thawm nei hatin an lo la lut tawh.

Spain tan pawha la inlan lo Carreras hi 2017-2020 inkar kha Real Madrid academy-ah a lo awm tawh a, hemi hnu hian Manchester United academy lamah a awm zui.

Mahse, United senior team tana inlan hman loin, Under-21 tan a inlan ṭhin a, Championship club Preston North End, La Liga club Granada leh Portuguese club Benfica-ah te loan-in a khel hman.

January 2024 khan Benfica hi loan-in a zawm a, season zawhah €6mtd-in a nghetin a zawm zui. Portuguese club tana season khat dang a khelh leh meuh chuan €50mtd man a tling der - Benfica tan chuan sum tuakna ṭha tak a ni.

Hetihrual hian Benfica hian Manchester United nen inremna an neih sa angin, Carreras an hralhna aṭanga 20% chu Red Devils hi an pe ve dawn a, United hi hlawk lo tawp an ni bik lo.

Carreras hian Benfica tan match 68 khel hmanin, goal nga a khung a, assist vawi ruk a nei. Season hman zawh takah khan Benfica chu Portuguese League Cup-ah a champion pui a, Primera Liga Team of The Year-ah a tel bawk.

Spain Under-19 leh Under-21 tan a khel tawh a, senior team-ah erawh a la khel lo - Real-in an ngamna zat thlirin, hmun a chan a rinawm a, Spain tan pawh a inlan har a rinawm lo.

Real hian Carreras hma hian Arnold (€10mtd), Bournemouth centre back Dean Huijsen (€59.5mtd) leh River Plate rawlthar midfielder duhawm Franco Mastantuono (€45mtd) te an la lut tawh a, squad an thuam ṭha mek zel.