Shillong Premier League Mizo tamna Lajong an champion

Shillong Lajong chuan season thum chhung a zawna an champion-na ni turin Nilaini zan khan Shillong Premier League final-ah Rangdajied United FC chu 3-2 in an hneh. I League club tan Lalrammuana chuan goal hnih khungin Alen Deory goal khung tur a siam sak bawk a, Chhinga Veng tlangval Rammuana hian inelna pumpuiah goal kua khungin season hnih chhung SPL-ah top scorer a ni ta.

Jawaharlal Nehru Sta-dium, Shillong-a inkhelah hian Shillong Lajong tan Mizo player zingah Ram-muana bakah midfielder Jacob Lalrawngbawla, winger Isaac Vanmalsawma, striker Samuel Lalmuanpuia leh wing back Joe Zoher-liana ten inkhel bul an ṭan a, midfielder Joseph Lal-fakzuala chu second half-ah tlan luhtir a ni bawk.

Shillong Lajong-in no-mawi an chawina kawngah goal kua khungtu Rammuana bakah goal sarih khungtu Samuel Lalmuanpuia leh India international Isaac Vanmalsawma te chu player pawimawh pawl an ni a, final-a goal hnih hi Hnahthial rawlthar Isaac ke aṭanga chhuak a ni.

Zemabawk rawlthar Sa-muel-a chuan, "Vawi thum a zawna champion thei nih chu a nuam a, a danglam bik a ni. Kum 2014-a kan champion khan Joe-a tih loh Mizo dang zawng hi chuan Shillong Lajong tan kan khel vek tawh a, kan thlen chin hi a ropuiin a nuam thlawt a ni," tiin Vanglaini palai a hrilh.

SPL hi cricket inelna Indian Premier League kal-phunga khelh a ni a, league khelh zawh a nih hnuah table-a pakhatna leh pahnihnain semifinal an khel a, a chak zawkin final an lut. Semifinal-a chak lo zawk team hian table-a pathumna leh palina inhmachhawna chak zawk an tum leh a, final luhna chance vawi hnih an nei tihna a ni.

Shillong Lajong hian table chung bera awm chung-in league round an khel zo a, mah se semifinal-ah Mizo rawlthar Samuel-a'n goal a khung chungin final-a an hneh tak Rangdajied hi 2-1 in an ngam lo a, an chance vawi hnihnaah erawh Royal Wahingdoh hnehin final hi an lut ta tho a ni.