National Championship khel tur Rinpuia

Mizoram Table Tennis Asso-ciation (MTTA) chuan No-vember 14-19 chhung hian 11Even Sports TTFI Natio-nal Ranking Table Tennis Cham-pionship, 2016 chu R. Dengṭhuama Indoor Stadium, Mualpuiah a thleng dawn. He hunah hian Mizo zinga National Youth champion ni hmasa ber leh awmchhun ni bawk Lalrinpuia a inlan dawn.

National Ranking Cham-pion-ship-ah hian singles cate-gory 10 - Cadet Boys, Cadet Girls, Sub Junior Boys, Sub Junior Girls, Junior Boys, Junior Girls, Youth Boys, Youth Girls, Men's leh Women'n Singles hmangtea inelna neih tur niin category tinah hian Mizo player an inlan kim vek dawn - MTTA hnuaiah player 39 an inlan ang.

India ram state hrang hrang 26 bakah institution 10 aṭangin infiammi 763 zet kalkhawm turin an inziak lut tawh. Men's Singles chu hming pe lut tamna ber niin 114 zet an inlan ang. He category bikah hian India number 1 G. Sathiyan a inlan dawn a, ani hi ITTF World Tour, Belgium Open a champion hlim a ni nghe nghe.

Inbuatsaihna

Mizoramin a vawi khat nan-a National Ranking Cham-pionship a thlen tur atan hian kumin June thla aṭang khan ngawrh takin inbuatsaihna neih a ni tawh. Mizoram hminga khel tur hian ranking-a a sang player leh discipline nei ṭha aṭangin player 18 thlan chhuah a ni.

Player thlan bik 18 te hian head coach R. Lallunghnema, coach Zorema Pachuau leh F. Lal-rin-sailova bakah manager R. Lalsangzuala te kaihhruaina hnuaiah MTTA Hall, Mission Vengah camp neiin ngawrh takin in-buatsaihna an nei. Training camp zawm lo zinga Mizo player dangte hi chu senior player leh mah^-ni insengsoa inlan tur an ni thung.

Kumin March thla a neih zawh tak National Level North East Games Imphal-ah khan Mizoram mipa team chuan final-ah a thlengtu Manipur hnehin gold medal an lo dawng tawh a, hmeichhe team-in silver an dawng thung. Tun hnaia Mizoram TT hmasawn dan ngaihtuahin MTTA chuan tun hma lama a la hlawhtlin ngai lohna national Ranking Championship-ah hian medal dawn beisei ngam turin inbuatsaihna an nei mek. TT khawmpui lian an thlen tur inbuatsaihna atan bik hian MTTA chuan tournament pawh a lo buatsaih tawh.

Beiseina

MTTA hnuai training nei lo zingah youth boys leh men's singles category-a inlan turin 2015 National Youth champion Rinpuia leh world champion pawh lo ni tawh Peter Karlsson kaihruaina hnuaia inzir Lalhunhlua te chu Mizoram tan an khel dawn.

Maubawk tlangval Rinpuia hian 77th Junior and Youth Natio-nal & Inter - State Table Tennis Championship 2015, Dha-ram-shala, Himachal Pradesh-a neihah khan khawvela TT thiam ram Japan-a training nei ṭhin Manav Thakkar hnehin a cham-pion a, Petroleum Sports Promotion Board, Ajmer aṭanga inzir chhuak Rinpuia hian India huap inelna lianah Mizoram TT chanchin bung thar a lo ziak tawh.

Falkenburg TT Academy-a inzir tawh Hunhlua hian sulhnu ṭha a lo nei ve tawh bawk. New Capital Complex tlangval hian kumin April thlaa Sweden-a khelh zawh tak Candelux Table Tennis Open-ah khan bronze medal a lo dawng tawh a ni.

Tualchhung player zing-ah Mizoram number 1 Lalmal-sawma chu men's singles-ah a inlan dawn a, cadet boys-a India number 8 Thangsiansanga bakah National Sub Junior-a silver medal lo la tawh Robert Pachuau hmel hmuh tur a awm dawn bawk. Anni pathum hi tualchhunga aṭanga inzir chhuak mah nise theihna an neih san bakah ngawrh taka training nei an nih avangin medal an dawng a nih pawhin a mak lo ang.

Mizo dang

National Ranking TT Cham-pionship khel tur hian Mizo player zinga India aiawh pawha lo inlan fo tawh Jeho Himna-kulhpuingheta leh Alberto Lalremruata bakah John Zam-liana te chu an inzir mekna Petro-leum Sports Pro-mo-tion Board hmingin sub junior-ah an inlan dawn. Anni pathum bakah hian India state zinga TT thiam tia sawi ṭhin Haryana tan H. Lalruatsanga (cadet boys) leh Roluahpuia (sub junior) te an inlan dawn bawk a ni.

PSBB aiawha rawn inlan tur zingah Jeho-a hi player ngaihven hlawh a ni dawn. Lunglei Salem Veng rawlthar hian India ram hmun hrang hrangah hlawhtlinna lo chang tawhin September thla pawh khan India Junior and Cadet Open - International Table Tennis Federation Premium Junior Circuit 2016 Cadet Boys Team zingah inlanin Cadet Boys-ah silver medal an lo dawng tawh.