Manager pahnih dinhmun hril thei England vs Scotland

Zanin World Cup qualifier-ah British Derby khelh a ni dawn a, England chuan an stadium chhuanvawr Wembley-ah dar 1:15 hian Scotland an mikhual ang. Zanin inkhel hi ram pahnih manager dinhmun hril thei tur a nih avangin inkhel hmuhnawm tak a ni dawn.

Scotland hian hnehna an chang zo lo a nih chuan coach Gordon Strachan-a dinhmun a derthawng dawn tihna a ni a, England manager lailawk Gareth Southgate-a'n hnehna a chang a nih chuan Three Lions manager nghetah ruat zui a ni a nih pawn a mak lo ang.

Scotland buaina

Tun hnaiah Scotland-in beisei an phak loh avangin coach lungawi lo Gordon Strachan chuan, "Hlauhthawnna nena khel ṭhin footballer rual kan kawl a ni," tiin a naute na takin a sawisel a, an dinhmun ṭhat lohzia hi hairual a ni lo.

Scotland hian Group F-a team paruk awmnaah palina dinhmun an luah mek a, vawi thum khelh tawhah vawi khat chaka vawi khat tlawm tawhin point li an hmu mek a, an beiseina chhi nung leh tur chuan tlawm hmel la hmu lo England lakah hnehna an chan a ṭul ang.

Euro khelh zawh takah United Kingdom rorelna hnuaia ram England, Wales, Republic of Ireland leh Northern Irelnad ten last 16 an lut vek a, Britain rorelna hnuaia ram zingah Scotland hian inelna pawh an thleng phak ve lo - England an hneh loh chuan Scottish Football Association tan Gordon Strachan-a chunga rinna nghah zel a harsa dawn.

England buaina

Euro 2016-a beisei an phak loh hnuah England-in hmathlir thui tak nei chungin Sam Allardyce an lalut a, Sunderland boss hlui hi eirukna avanga a hming chhiat hnuah ban niin Gareth Southgate chu manager lailawk atan ruat a ni.

England Under 21 coach enkawlna hnuaiah hian Three Lions-in awlsam takin Malta hneh mah se an match hnihnaa Slovenia nen an inhnehtawk
ṭumah erawh point khat hlawh chhuak turin goalkeeper Joe Hart-a save ropui an mamawh a, zanina an khelmuala inkhel turah England fan-ten inkhel danglam an beisei ang.

Tlarhma lamah England-in tunge an hmachhuan ang? tih hi zawhna awm chu a ni. Southgate-a'n captain Wayne Rooney-a ringtawk lo tih lantir nan Slovenia lakah bench-ah a dah tawh a, zaninah a khelh tur thu sawi mah se midfield-ah a chhawr a rinawm zawk. Marcus Rashford leh Daniel Sturridge-te hi club lama bench luahlumtu an ni a, Jamie Vardy lah season hmasa nena khaikhin chi a la ni rih lo bawk.

Kar sarih zet hliam vanga a chawlh hnuah Tottenham striker Harry Kane lo kir leh tawh mah se rinrawl ni nghal tur em chuan a dinhmun a la ngaihtuahawmin a rinawm a, tun hnaia khel ṭha ṭhin Theo Walcott chu a nupui rai vangin 'engtiklai pawha squad aṭanga chhuak thei' a nih thu coach Southgate chuan a sawi bawk - Three Lions dinhmun hi a ṭha lo.

Inlan tur

Leicester midfielder Danny Drinkwater leh Southampton keeper Fraser Forster inhliam vangin West Ham defender Aaron Cresswell leh Sunderland keeper Jordan Pickford te koh an ni a, Cresswell-a'n England squad-a hmun a chan vawi khatna a ni.

Scotland tan striker Steven Fletcher chu a khupa hliam a tuar hnuah a inlan theih dawn leh dawn loh a chiang lo a, ram tan inkhelh a chawlhsan hnua lo kir leh Celtic midfielder Scott Brown erawh inlan thei tura beisei a ni thung.

Scotland assistant Mark McGhee chuan, "Steven Fletcher dinhmun a ngaihtuahawm deuh hlek a, player dang zingah erawh ngaihtuahawm an awm lo," tiin England hmachhawn tur an player te an dam ṭhat thu a sawi.

Southgate-a tan

Liverpool midfielder Adam Lallana chuan England chuan an ram team dinhmun an sawhnghet dawn a nih chuan manager nghet neih thuai an mamawh thu a sawi a, an mamawh manager nghet nei turin Southgate-a tan an beih tur thu a sawi.

Lallana chuan, "Southgate-a tan kan theihtawp chhuah turin kan inpeih a, England manager hna hi a ngheta a thawh theih nan ṭha taka hna a thawh theih ka beisei. Gareth-a leh keini tan pawh England hi a ngheta a enkawl dawn leh dawn loh hriat thuai a pawimawh a ni," tiin a sawi.

England hian Scotland an hmachhawn zawhah Spain nen friendly match an khel leh dawn a, manager lailawk Southgate hi a ngheta an ruai a nih loh chuan a hun a tawp nghal zui bawk ang.

England Squad

Goalkeepers: Joe Hart (Torino), Tom Heaton (Burnley), Jordan Pickford (Sunderland).

Defenders: Ryan Bertrand (Southampton), Gary Cahill (Chelsea), Nathaniel Clyne (Liverpool), Aaron Cresswell (West Ham), Phil Jagielka (Everton), Michael Keane (Burnley), Danny Rose (Tottenham Hotspur), John Stones (Manchester City), Kyle Walker (Tottenham Hotspur).

Midfielders: Eric Dier (Tottenham Hotspur), Jordan Henderson (Liverpool), Jack Wilshere (Bournemouth), Adam Lallana (Liverpool), Jesse Lingard (Manchester United), Wayne Rooney (Manchester United), Raheem Sterling (Manchester City), Andros Townsend (Crystal Palace).

Forwards: Theo Walcott (Arsenal), Harry Kane (Tottenham), Marcus Rashford (Manchester United), Daniel Sturridge (Liverpool), Jamie Vardy (Leicester City).

Scotland Squad

Goalkeepers: Craig Gordon (Celtic), Jack Hamilton (Heart of Midlothian), David Marshall (Hull City).

Defenders: Christophe Berra (Ipswich Town), Gordon Greer (Blackburn Rovers), Grant Hanley (Newcastle United), Stephen Kingsley (Swansea City), Russell Martin (Norwich City), Charlie Mulgrew (Blackburn Rovers), Callum Paterson (Heart of Midlothian), Lee Wallace (Rangers).

Midfielders: Ikechi Anya (Derby County), Barry Bannan (Sheffield Wednesday), Scott Brown (Celtic), Oliver Burke (RB Leipzig), Darren Fletcher (West Bromwich Albion), James Forrest (Celtic), James McArthur (Crystal Palace), John McGinn (Hibernian), James Morrison (West Bromwich Albion), Matt Ritchie (Newcastle United), Robert Snodgrass (Hull City).

Forwards: Steven Fletcher (Sheffield Wednesday), Leigh Griffiths (Celtic), Chris Martin (Derby County), Steven Naismith (Norwich City).