Carolina Marin man a to ber

Nilani zan khan Premier Badminton League (PBL) season hnihna atana player lilamna hun chu neih niin Rio Olympic champion Carolina Marin man a to ber. World champion vawi hnih ni tawh hi Hyderabad Hunters chuan nuai 61.5 in an lei.

India shuttler zingah Rio Olympics quarter finalist Kidambi Srikanth chu manto ber niin Awadhe Warriors leh Bengaluru Blasters ten an inchuh zak zak hnuah nuai 51 zetin Warriors-in an chang. Rio Olympic-a India tana silver medal latu P V Sindhu chu Chennai Smashers-in nuai 39 in an lei a, world number 1 hlui Saina Nehwal chu nuai 33-in Awadhe Warriors-in an chang thung.

Hyderabad nula Sindhu chuan, "Mi tam takin pawisa aṭangin thil an teh a ni thei a, kei erawh chuan engtiangin nge Indian badminton hian hma a sawn zel theih ang tih hi ka ngaih pawimawh ber a ni. Chennai tana ka khel thei tur hi ka lawm a, inelna hautak tak a ni dawn tih hrelawk chungin ṭha takin kan inbuatsaih ang," tiin a sawi.

Chennai Smashers neitu Vijay Prabhakaran chuan, "Player ṭha leh mipui ṭan hlawh tur neih ngei kan tum a, sum sen pawh kan hreh lo. Sindhu neih ngei tumin hma kan la a, a ṭul a nih chuan nuai 65 thleng pawh sen kan inhuam hial reng a ni. India tihmingṭhatu nuai 39-a kan lalut thei hi kan tan chuan a lawmawm takzet," a ti.

Player manto pahnihna chu South Korean nula Sung Ji Hyun niin nuai 60-in Mumbai Rockets in an lei. Denmark shuttler Jan 'O' Jorgensen chu nuai 59 man niin Delhi Acers player tur hi manto pathumna a ni.

Nakkum January 1-14 chhunga khelh tur PBL-ah hian Chinese leh Japanese shuttler ho an inlan dawn lo a, an ram inelna an neih dawn vang nia sawi a ni. Chinese duo Chen Long leh Lin Dan te chu inlan lo tur langsar niin Malaysian thiampuipa Lee Chong Wei hmel pawh kan hmu dawn lo.

PBL-ah hian team paruk an inel dawn a, team tinte hi league-ah round-robin hmangin an inel dawn. Match khatah hian men's singles match hnih bakah women's singles, men's doubles leh mixed doubles vawi khat ṭheuh khelh tur a ni ang. An inkhelh kual vek hnuah a sang paliin semifinal an khel ang.

Khawvela badminton inelnaa lawmman sumfai tamna ber turah hian vaibelchhe ruk sem ral tur niin champion team hian vaibelchhe thum an dawng ang. Pahnihna in vaibelchhe 1.5 dawngin semifinal-a tla team pahnihin nuai 75 ve ve an dawng bawk dawn a ni.

PBL a inlan tur player leh an leina zat

Awadhe Warriors: Men's singles: K. Srikanth (51 lakh), Aditya Joshi (3 lakh); Women's singles: Saina Nehwal (33 lakh), Rituparna Das (6 lakh); Men’s doubles: Boodin Isara (Thailand, 17 lakh), V. Shem Goh (Malaysia, 33 lakh), Markis Kido (Indonesia, 10 lakh). Mixed doubles: Savitree Amitrapai (Thailand, 20 lakh) and Prajakta Sawant (3 lakh).

Bengaluru Blasters: Men's singles: Viktor Axelsen (Denmark, 39 lakh), Sourabh Varma (13 lakh), Boonsak Ponsana (Thailand, 10 lakh); Women's singles: Porntip Buranaprasertsuk (Thailand, 22 lakh), G. Ruthvika (7 lakh); Men's doubles: Yoo Yeon Seoung (Korea, 39 lakh), Ko Sung Hyun (Korea, 33 lakh), Pranav Chopra (10 lakh); Mixed doubles: Ashwini Ponnappa (15 lakh) and Sikki Reddy (5 lakh).

Chennai Smashers: Men's singles: Tanongsak Saensomboonsuk (Thailand, 30 lakh), Tommy Sugiarto (Indonesia, 26 lakh), P. Kashyap (8 lakh); Women's singles: P. V. Sindhu (39 lakh), Arundhati Pantawane (3 lakh); Men's doubles: Chris Adcock (England, 26 lakh), Mads Pieler Kolding (Denmark, 25 lakh), B. Sumeeth Reddy (5 lakh), Mixed doubles: Gabrielle Adcock (England, 26 lakh) and Ramya Tulasi (3 lakh).

Delhi Acers: Men's singles: Jan O Jorgensen (Denmark, 59 lakh), Son Wan-Ho (Korea, 39 lakh), Siril Verma (4 lakh); Women's singles: Nitchaon Jindapol (Thailand, 17 lakh), Akarshi Kashyap (3 lakh); Men's doubles: Vladimir Ivanov (Russia, 27 lakh), Ivan Sozonov (Russia, 17 lakh), Akshay Dewalkar (7 lakh); Mixed doubles: G. Jwala (10 lakh) and K. Maneesha (5 lakh).

Hyderabad Hunters: Men's singles: B. Sai Praneeth (21 lakh), Rajiv Ouseph (England, 17 lakh), Sameer Varma (11.50 lakh); Women's singles: Carolina Marin (Spain, 61.50 lakh), Krishna Priya (3 lakh); Men's doubles: Wee Kiong Tan (Malaysia, 33 lakh), Boon Heing Tan (Malaysia, 23 lakh), Satwik Sairaj (3 lakh); Mixed doubles: Chau Hoi Wah (Hong Kong, 17 lakh) and J. Meghna (3 lakh).

Mumbai Rockets: Men's singles: H. S. Prannoy (22 lakh), Ajay Jayaram (19 lakh) and Shreyansh Jaiswal (3 lakh); Women's singles: Sung Ji Hyun (Korea, 60 lakh), Vrushali (3 lakh), Men's doubles: Lee Yong Dae (Korea, 37.50 lakh), Nipitphon Phuangphuapet (Thailand, 17 lakh), Manu Atri (7 lakh); Mixed doubles: Nadiezda Zeiba (Poland, 18 lakh) and Mohit Sahdev (3 lakh).