Delhi hmaah Chennaiyin an mualpho

Nilaini zan Indian Super League inkhelah champion lai Chennaiyin FC an mualpho a, Delhi Dynamos chuan an mikhual lakah hian ṭhat chhuah duh loin 4-1 zetin an sawp.

Delhi Dynamos tan Chelsea winger hlui Florent Malouda chuan goal hnih khungin a khel ṭha takzet a, Richard Gadze leh Kean Lewis te chuan mualneitu team tan hian goal khat ve ve an thawh bawk. Chennai tan Paris Saint Germain defender hlui Bernard Mendy chuan goal khat khung ve mah se awmzia a nei thui lo.

Jeje Lalpekhlua'n Vanglaini palai hnena a lo sawi tawh ang ngeiin coach Marco Materazzi-a'n tlarhmaah player a siksawi avangin Hnahthial tlangval hian inkhel bul a ṭan lo. Italian manager-in goal an mamawh tih a hriat hnuah India international striker hi tlan luhtir mah se Jeje-a'n a hun
ṭha neih vawi hnih a chhawr thei lo a, Chennaiyin an mualpho.

Chennai club tan Farkawn khuaa piang Jerry Lalrinzuala'n ṭum dang ang bawkin inkhel bul a ṭan a, Delhi Dynamos lamah Champhai tlangval Lalchhawnkima'n starting eleven-ah hmun la changlet thei lo mah se bench aṭangin tlan luhtir a ni bawk.

Mimal Lawmman

Emerging Player of the Match Kean Lewis, Delhi Dynamos

Hero of the Match Florent Malouda, Delhi Dynamos

Zanin Inkhel Tur

FC Goa 07:00 PM NorthEast United