Zaninah Dinthar FC-in phuba lak an tum dawn

September 15 tlaiah Chanmari West FC-in Mizoram Premier League champion hmasa ber Dinthar FC chu 4-0 in an sawp a, West Warrior hian hun ṭha ṭhahnem tak an hlah bawk. Aizawl West Derby-a an mualpho vangin Dinthar FC-in an veng pa Lalhlupuia Sailo chu coach atan an ruat a, result ṭha nei turin player
ṭha an pe bawk. Coach Lalhlua hnuaiah Dinthar FC-in match sarih khel tawhin point 10 an sual chhuak a, tunah chuan relegation bakah semifinal an thlir tel tawh thung.

Zanin dar 7:00 hian Dinthar FC-in an foreigner pahnih Balogun Hammed leh Clarence Carter bakah Nepali striker Cho Tshering Lepcha hmachhuanin Chanmari West an hmachhawn dawn a, inkhelh hmuh-nawmah entu an tam ngei beisei a ni.

Dinthar an thar

Dinthar FC- hian Nigerian defen-der Hammed leh midfielder Carter te an neih hnuah hneh loh a tawng tawh lo. MPL1 champion hian hma-hruaitu Bethlehem VT an hneh hnuah Chanmari FC an draw a, match hnu-hnung berah Zo United an hneh leh bawk.

Dinthar boss Lalhlupuia Sailo chuan, "Keini tan chuan chak ngei ngei a ngai a, attacking football khelh hi kan tih theih awmchhun a ni. Ramhlun North, Chhinga Veng leh Zo United te hi kan el pui vek an ni a, an result neih ṭhat leh ṭhat loh hi kan kutah a innghat lo. Chuvangin kan tih theih awm chhun chu kan khingpui apiang hneh tum zel hi a ni," tiin chak an mamawh thu a sawi.

Tunah hian Dinthar FC-in point 11 an hmu tawh a, table mawng-phaha awm Zo United nen an in-thlauhna chu point li chauh a ni a, hetiang zat tho hi palinaa awm Aizawl FC nena an inthlauhna a ni.

Chanmari West coach HC Zarzo-liana chuan, "Transfer window zawhah Dinthar FC-in goalkeeper, defender, midfielder leh forward thar an nei vek a, team ṭha zawk an ni. Kan inkhelh hmasak zawk ṭuma kan sawp kha chu kan theihnghilh a ṭul a, tuna kan hmachhawn tur Dinthar FC hi club thar an ni," tiin a club hlui Dinthar FC a fak.

West Warrior an huai

Chanmari West FC-in match hnuhnung pahnihah Aizawl FC leh Bethlehem VT FC te an hneh lo a, amaherawhchu result aṭanga thlir tur an ni lo. West Warrior hian Aizawl FC an hneh loh chhan hi an goal khung offside (?) vanga an pawm loh vangah a ngaih theih a, BVT an hneh loh ṭumin goal hmaah an vanduai - woodwork vawi thum zet an tih per.

West Warrior coach Zara chuan, "Phase 1-ah khan match hnih chak loin bul ṭan mah ila kan tho chhuak leh thei a, tun ṭumah pawh hian vawi hnih kan chak loh hnuah kan tho chhuak leh ngei ang. Kan player-te an dam kim a, Dinthar hmachhawn turin kan inpeih a ni," tiin chak tuma khelh an tum thu a sawi.

Dampuia Vs Michael

Chanmari West tan captain Laldampuia'n goal ruk a khung tawh a, Dinthar forward Michael Lalremruata'n hetiang zat bawk hi a khung tawh bawk. Foreigner vangin Dinthar ṭha sawt mah se tlar hmaa hmawr bawktu chu Khatla tlangval Michael a la ni tho a, foreigner nei lo West Warrior tan Dampuia leh amah thlawptu R. Laldanmawia, H. Lallianzama leh Lalmuanzuala te chu champion pui tham an ni bawk.

Mipui an pawimawh

Dinthar FC-in ṭantu ṭha tak nei lo se Zo United an khelh ṭumin point thum hlawh chhuak loin point khat zawk an hmuh a rinawm. MPL1 champion hian MPL-ah club dang entawn turin thawm an nei ṭhin a, West Warrior an hmachhawn nawn hunah hian an tam lehzual ang.

Chanmari West hian MPL an khelh ṭantirha an ṭantu neih ang zat kha an nei pha tawh lo a, chutichung chuan ṭantu nei ṭha lo tih tur an ni lo. Aizawl FC an hneh loh ṭumin
ṭantu ṭha tak an nei a, tawnhriat nei ṭha I League club pawh an talbuai phah hialah a ngaih theih. Dinthar an hmachhawn hunah Chanmari West mipui an pawimawh dawn.