MBL2 champion hriat zan Mission Veng Vs Tuikual Shutters
Mission Veng hartharnain a tawp a thleng zo dawn nge inelna ṭan hmaa champion rinkai Tuikual Shuttlers-in nomawi an chawi zawk dawn. Inhnial buai ngai loin zaninah Electric Veng YMA Hall-ah tihchianin a awm dawn a, sawi lawk theih chu badminton ngaina tan chuan Hrangbana Memorial 2nd Mizoram Badminton League final hi a hmuhnawm ang.
Rs 10 chauh
MBL2 final programme hi zanin dar 7:45 hian ṭan a ni dawn a, hemi zawh hian Mission Veng leh Tuikual Shuttlers ten nomawi an inchuh nghal ang.
Electric Veng YMA Hall-ah
ṭhutna an tam loh avang leh inkhel en man Rs 10 a nih avang-in a hmuna en tum tan chuan kal hma a finthlak ang.
Tuikual chak chiang
Mission Vengin final lut tur-in Aizawl khaw pawn team awmchhun Champhai Shuttlers chu 3-2 in an hneh a, Tuikual Shuttlers-in Nilaini zan khan Saron Veng Jeremy's Smashers chu 3-1 in an hneh ve bawk.
Tuikual hian league round-ah Saron Veng an hneh tawh a, semi-final-ah result a danglam chuang lo. MBL1 aṭang tawha hneh loh la tawng lo Daniel S. Farid-a'n a record duhawm chhawm nung zelin men's singles-ah H. Lalawmpuia lakah hnehna a chang nghal a, amaherawhchu Karnataka shuttler chakna hi semifinal-a Saron Veng chak chhun a ni.
Tuikual-in men's doubles, mixed doubles leh 35+ men's doubles-ah hnehna an chang chhunzawm a, match hnuhnung ber men's singles khel tura dah ṭhat BAI ranking-a number 1 Neeraj Vashisth a inlan a ngai lo hial. Tuikual tlangval Lalduhawma'n mixed doubles leh men's doubles-a an veng club a chak pui avangin player of the tie atan thlan a ni.
Hei le, final chu
Final khelh dan tur a chiang tawh a, men's singles aṭanga bul ṭanin men's singles bawka khar a ni dawn. Inkhelh dan tur indawt chu men's doubles, mixed doubles, men's singles, 35+ men's doubles leh men's singles a ni ang.
League round-ah Mission Veng-in final-a an hmachhawn tur Tuikual hi 3-2 in an hneh a, knockout stage chu ni tawh se 3-1 in inkhel hi a tawp ang. Hei erawh hriat a ṭha, final-ah erawh Tuikual hian an player rem dan an thlak tawh ang a, a ngaihnawm sawt dawn.
Tuikualin BAI ranking-a number 1 Neeraj Vashisth an kawl avangin singles pakhat hi chu an lak hmel a, amaherawhchu match tawp ber khel turin Haryana shuttler hi an dah nawn ang em tih hi zawhna awm thei a ni. Mission Veng lamin Abhishek Yeligar bakah Mizoram number 1 RK Manajit Singh an kawl avangin singles pakhat chu an la ngei tura ngaih a ni bawk.
Tuikual lamin Mizoram hmeichhe number 1 Lalrinzuali an kawl avangin mixed doubles an lak mai a rinawm a, chak chian an duh dawn avangin Lalmama nen an inkawp a rinawm bawk. Mission Veng lamin men's doubles-ah an neih ṭhat pahnih Abhishek leh Manajit te an inkawptir nawn a nih chuan Neeraj leh Lalmama te inkawp tan pawh hneh an harsa dawn.
Chiang taka lang ta chu final danglamna hril thei tura nia lang ta chu 35+ men's doubles a ni. An intawn hmasak ṭumin Mission Veng tana Lalrindika Ralte leh Albert Lalnunhlima te ṭang dunin chak tur zawka ngaih Lalbiakmawia leh Benjamin Lalrintluanga te an hneh a, hei vang hian 35+ a men's ranking-a 3-na BM-a hian semifinal-a a kawppui Lunglei shuttler Lalbiaknia (35+ a men's ranking-a 3-na) nen an inkawp ang.
Semifinal 2 : Tuikualin Saron Veng 3-1 in an hneh
Category Saron Jeremy's Smashers Tuikual Shuttlers Game
MS Daniel S. Farid H. Lalawmpuia 15 - 8, 15 - 12
XD R. Lalbiaksanga & Lalduhawma & 15 - 12, 7 - 15, 13 - 15
Lalduhzuali Lalrinzuali
MD Daniel S. Farid & Neeraj Vashisht & 3 - 15, 10 - 15
M Joseph Lalduhawma
35+ MD K. Lalrinnunga & Lalbiakmawia & 14 - 15, 15 - 14, 8 - 15
Dr. Benjamin Lalrammuana Lalbiaknia
MS R. Lalbiaksanga Neeraj Vashisht -
Player of the tie - Lalduhawma, Tuikual Shuttlers