Zo United tan thawh a hun

Mizoram Premier League Season 5-a table mawngphaha awm mek Zo United-in coach thar Remlalthlamuanpuia (Sabito) hnuaiah match thum a zawnin an chak lo tawh a, vawiin tlai dar 3:00-a Aizawl FC laka point an hmu lo a nih chuan an hmabak a thim khawp ang.

I League club Aizawl FC-in season ṭantirhah a zawna vawi thum champion an tum thu chiang takin an sawi a, amaherawhchu an beisei angin an kalkawng a mam bik lo. K. Malsawmkima hote hian vawi li hneh loh an tawng tawh a, an khingpui Zo United aiin vawi khat chiahin an chak lo tlem.

An match hnuhnung bera Chanmari West an hneh danah pawh an vannei tih phat rual a ni lo a, foreigner pahnih Bright Middleton Mends leh Benjamin Onome ten danglamna an thlen theih bawk loh avangin an buai ru ve hle.

Zo United technical director James Khamlian-sawma chuan, "Aizawl FC hi chu team ṭha an la ni reng a, han zuam theih an ni lo. Kan dinhmun thlirin chak kan mamawh tawh si a, chak tumin kan khelh a ṭul. Chutihrualin I League club laka point khat hlawhchhuah hlutzia kan hria," tiin point hmuh a inbeisei thu a sawi.

Aizawl FC lam hian inhliam vangin winger ṭha pahnih Albert Zohmingmawia leh Brandon VL Remdika te an chhawr thei dawn lo a, Chanmari West laka chakna goal khungtu William Lalnunfela a dam chiang lo bawk. I League club-in an ṭhat theih dan berin Zo Untied an hmachhawn thei dawn lo a, player naupang zawk ten an hun ṭha an hman
ṭhat a ṭul ang.

Aizawl FC coach Mala chuan, "MPL club kan intluk vek tih hi ka ngaihdan a la ni reng a, tumah dah hniam theih an ni lo. Chutihrualin hlauh hi kan nei hranpa lo a, player inhliam kan neih avangin Chanmari West kan hneh ṭuma attack char char ang kha chu kan tlin dawn lo a, amaherawhchu point thum hmu ngei turin kan khel ang," tiin inhliam vanga chhuanlam an siam loh tur thu a sawi.

I League club hian Durand Cup an khelh avangin MPL5 an ṭan tlai a, an match hmasa berah Zo United 3-0 in an sawp.