Mizoram junior team an inpeih

Junior Boys' National Football Championship for Dr. B. C. Roy Trophy khel turin Mizoram chuan July 18, Zirtawpni hian Aizawl an chhuahsan dawn. Inelna hi Amritsar, Punjab-ah khelh a ni dawn a, Mizoram hian match hmasa berah Chandigarh chu July 21, Thawhṭanniah an hmachhawn ang.

Mizoram team hi inelna hrang hranga champion tawh coach HC Zarzoliana'n a hruai dawn a, assistant coach Lalnunmawia hi Santosh Trophy 2014-a Mizoram champion puitu winger kha a ni. Ramhlun South pa Zara hi T. Vanlalhluna nen thawk dunin MPL hmasa berah khan Dinthar FC an champion pui a, Santosh Trophy-a an champion ṭum pawhin H. Vanlalthlanga assistant coach-ah a ṭang bawk. Mizoram chhung inelnaah a team enkawl a champion pui fo tawh a, Mizoram team pawh senior leh junior-ah vawi 10 zet nomawi a chawipui tawh a ni.

Mizoram manager Lalbiakzuala hi MFA assistant secretary a ni a, FC Kulikawn vanglaia team kaihruaitu ber kha niin Mizoram manager ṭha ber zinga chhal ngam a ni. Kulikawn pa Biaka hi Mizoramin Santosh Trophy an champion ṭum khan manager hna a thawk tawh bawk.

Biaka chuan, "July 2-15 chhung kha residential camp kan nei a, khami hma lam khan player selection neiin training kan nei chho char char tawh bawk a, inelna hmachhawn turin kan inpeih tawh. Nomawi chawi ngei kan tum a, kan coach-te pawh an inringtawk khawp mai," tiin a sawi.

Inelna hi Guru Nanak Stadium-ah khelh a ni dawn a, Mizoram hi group D-ah Chandigarh (July 21), Chhattisgarh (July 23) leh Maharashtra (July 25) te nen an awm ho. Mizoram hi tier 1-ah an awm a, tier 1-ah hian team 16 awmin group liah an inṭhen. Group khat aṭangin pakhat chauh tlang tur niin Mizorma hi an group-a pakhatna an ni thei a nih chuan semifinal an lut nghal ang.